Mpồl lơh broă bal mờ ala măt kwang đơng lam bồ càr Điện Biên neh ơn goàng bơkàu, chu ñàng tàm Hìu duh kah cau ling chơ̆t màng tiah tam lơh Điện Biên Phủ mờ Ƀlàng tơ̆p ƀào Cau ling chơ̆t màng A1. Tềng đăp hwềng suàn ală cau ling khin cha jak chài, cau ling chơ̆t màng dê, ồng Nguyễn Hoà Bình mờ ală kwang bàng tàm mpồl neh lời phuk jiơ kah kơlôi, tơnggŏ bơta kah rơngal uă ngan gơ wèt mờ dà kơlhề dờng ngan bơh ală cau ling khin cha jak chài, cau ling chơ̆t màng dê, là ală cau kòn jak chài ngan bơh jơi bơtiàn dê neh khin cha jak chài tam lơh, chơ̆t phi să tài broă lơh dong klàs jơi bơtiàn, sền gàr Dà lơgar.

Mơkung hơ pơn jăt tai đòm jăt bơhiàn Điện Biên Phủ khin cha jak chài, tam klăc bal, lơh ngan bal mờ jơh gùt Đảng, gùt ling klàng mờ jơh gùt làng bol lơh jăt geh cồng nha broă lơh bơ̆t bơtàu dà lơgar ngai sơlơ bơtàu tơnguh, pas sơm pràn kơldang. Drim dồ ngai bal, ồng Nguyễn Hòa Bình mờ mpồl lơh broă neh tus bal Dơ̆ bơyai lơh ai ngui hìu lơh broă bơh Anih cah rña làng bol càr Điện Biên dê, broă lơh bơ̆t bơtàu do geh priă tă lơh kờp jơh là 113 tơmàn đong.