Yal tàm dơ̆ lơh broă, ồng Phạm Minh Tấn, Phó Ƀí thư duh broă sùm Tỉñ ủy càr Dăk Lăk pà gĭt, bal mờ ală cồng nha neh lơh geh, 6 nhai bồ nam 2023, broă lơngăp lơngai cíñ trị, rơndăp tăp sèng lơngăp lơngai jơh gùt mpồl bơtiàn bơh càr dê kung gam sơl pơhìn gơlik geh uă jơnau kal ke. Broă lơh gĭt nền broă gơlik geh, ù tiah ƀòn lơgar, tiah kwơmàng bè lơngăp lơngai, rơndăp tăp sèng geh tơngai ờ hềt di tŭ, ờ hềt jrô ơnàng làm uă. Srơh jơh gùt làng bol sền gàr lơngăp lơngai Dà lơgar tàm bàr pe tiah ờ hềt ngan ngồn pràn kơldang kơ̆ kơl jăp.

Đơs tàm dơ̆ lơh broă, ồng Phan Đình Trạc, Kwang ătbồ Ƀan Nội cíñ Dà lơgar sồr Mpồl Lơh kơnòl broă sùm Tỉñ ủy càr Dăk Lăk sơlơ tơnguh tai gơnoar broă đơng lam, sồr lơh lam lơh jăt dùl ròt bal, tơl làm mờ tơnguh uă cồng nha ală broă lơh rơcăng lài kơryan sa kwề sa kwà, bơta ờ niam; lơh jăt di tŭ, wil tơl ală jơnau sồr, gùng dà, broă lơh bơh Đảng dê, adat boh lam bơh Dà lơgar dê bè rơcăng lài, sơndră sa kwề sa kwà, bơta ờ niam, gơ jăt bal mờ broă lơh bơ̆t bơtàu, lơh niam wơl Đảng. Kwơmàng, Mpồl Lơh kơnòl broă sùm Tỉñ ủy càr Dăk Lăk gàr niam bơta niam, bơsong bơta kal ke, gam gơkòl nàng sồr lơh jăt niam broă lơh sền gàr lơngăp lơngai cíñ trị, sền gàr rơndăp tăp sèng lơngăp lơngai jơh gùt mpồl bơtiàn, di tŭ gŏ, bơsong ală jơnau digơlan gơlik geh, ờ gŏ di lời gơtìp rơmơ̆t ndơl, nisơna.