VOV4.K’ho- Mho ngai 19/01, tàm ƀòn dờng Hồ Chí Minh, ồng Nguyễn Trọng Nghiã, Kwang ătbồ Ƀan Tuyên giáo dà lơgar neh còp bàr pe anih, cau geh bồ tơngoh jak, hìu bơnhă kal ke tàm ù tiah ƀòn dờng dê di dơ̆ wă rò sơnam pa sa tềp bơhiàn dà lơgar Ñâm Zần 2022.

Kwang ătbồ Ƀan Tuyên giáo Dà lơgar pà phan ai mò Triệu Lệ Anh in ơm tàm quận 5

Lòt còp Cơldŭ lơngăp lơngai internet mờ rơcăng sơndră cau lơh tìs kông nghệ kao Kwang àng ƀòn dờng Hồ Chí Minh, ồng Nguyễn Trọng Nghĩa kơ̆p kờñ Kwang àng ƀòn dờng gàr niam ală cồng nha neh lơh geh, sền gàr lơngăp lơngai cíñ trị, rơndăp tăp sèng ờdo ờdă jơh gùt mpồl bơtiàn mơkung là mpồl cau lam lài tàm broă rơcăng sơndră kòp bơtờp, mpồl cau lơh kơnòl broă sùm, mpồl cau tờm tàm broă gàr kơ̆ lơngăp lơngai rơndăp tăp sèng tàm ù tiah he dê. Mờ ồng Nguyễn Trọng Nghĩa pà gĭt, jơnau sồr bơh Đảng mờ Dà lơgar dê bè bơtàu tơnguh wơl mờ bơtàu tơnguh lơh sa- mpồl bơtiàn tơrgùm tàm 5 broă dờng. Tàm hơ̆ geh broă rơcăng sơndră kòp Kovid-19; lơh jăt niam broă lơh ờdo ờdă rài kis; lơh geh tiah kă bro ƀươn ai mpồl bơtiàn mpồl lơh sa kă bro in bơtàu tơnguh wơl lơh sa kă bro.

Cau mblàng Lơ Mu K’Yến