VOV4.K’ho- Mho ngai 14/4, Kwang atbồ Ƀan Tuyên giáo dà lơgar neh geh dơ̆ lơh broă mờ Thường vụ Tỉñ ủy Quảng Ngãi. Jat jơnau yal, quý 1 nam do, kờp jơh tă dia tàm càr Quảng Ngãi geh rlau 8 rbô 600 tơmàn đông, gơguh 56,5% pơndrờm mờ bal dùl tŭ nam lài. Gah lơh sa mờ măi mok pơn jat tai gàr sùm khà gơguh, khà lơh sa mờ măi mok quý 1 gơguh 6,8% pơndrờm mờ bal dùl tŭ nam lài. Priă geh bơh tac phan hờ lơgar ndai geh 533 tơlak dolar Mỹ, gơguh 27,2% pơndrờm mờ bal dùl tŭ nam lài.

Thượng tướng Nguyễn Trọng Nghĩa, Ƀí thư Đảng dà lơgar, Kwang atbồ Ƀan Tuyên giáo dà lơgar đơs niam ală cồng nha kuơmàng bơh Đảng ƀộ, gơnoar atbồ mờ làng bol càr Quảng Ngãi neh lơh geh tàm tơngai lài; mờ kung sồr càr Quảng Ngãi lơh ngan rlau tai nàng lơh geh uă cồng nha bè jơnau kờñ mờ Nghị quyết pơrjum dờng cau ala mat Đảng ƀộ càr dơ̆ 20 neh ai tơlik. Di dơ̆ do, ồng Nguyễn Trọng Nghĩa bal mờ mpồl kwang bàng neh tus chu ñàng, ơn bơkàu tàm hìu duh khoai cau ling khin cha jak chài jơi bơtiàn ƀồc ồng Trương Định, tiah tềl kah yau Sơn Mỹ, tiah ƀồc hìu cau jak chài kờñ gơboh dà lơgar ƀồc ồng Huỳnh Thúc Kháng.

Cau mblàng K’Duẩn