Di tơngkah kir sơnrai 76 nam Ngai cau ling sồt să, cau ling chơt màng, mho ngai 24/7, ồng Nguyễn Trọng Nghĩa, Kwang atbồ Ƀan Tuyên giáo dà lơgar bal mờ Mpồl kwang bàng bơh Ƀan Tuyên giáo dà lơgar dê neh lòt còp mờ lơh broă tàm càr Bến Tre mờ jàu pà priă lơh hìu nùs nhơm ai hìu bơnhă geh sră dong kờl bơh dà lơgar tàm càr do in. Đơs tàm dơ̆ lơh broă, ồng Nguyễn Trọng Nghĩa ai lơh chờ hờp ngan tềng đap bơta tam gơl bơh ù tiah bềng bơhiàn kac màng dê, mờ kung đơs nền: Đảng, Dà lơgar sền gròi ngan, sùm kah ưn ngài dà kơl hề tă pơgồp, bơta phi să dờng màng bơh ală cau ling khin cha jak chài, cau ling chơt màng mờ hìu bơnhă geh sră dong kờl bơh dà lơgar dê; broă lơh Kis git jơnau git adat, ai tơnggŏ bơhiàn “Hùc dà kah tô dà” sùm geh sền gròi, lam lơh sùm. Ồng kung sồr càr pơn jat tai đòm jat nùs nhơm bơh ƀòn Ntàu tam lơh khin cha jak chài dê, lơh niam rlau tai broă lơh kis git jơnau git adat, gròi sền rài kis ai ală mè Việt Nam khin cha jak chài, ală hìu bơnhă geh sră dong kờl bơh dà lơgar, hìu bơnhă geh màng mờ dà lơgar, hìu bơnhă rƀah, hìu bơnhă kal ke in nàng brồ guh gàr kơ̆ kơljap rài kis, pơgồp bơnah bơtàu tơnguh càr mờ dà lơgar.

Kwang atbồ Ƀan Tuyên giáo dà lơgar ồng Nguyễn Trọng Nghĩa mờ Mpồl kwang bàng neh jàu pà 9 nơm hìu nùs nhơm ai hìu bơnhă geh sră dong kờl bơh dà lơgar gơtìp kal ke bè hìu ơm tàm càr Bến Tre in mờ kờp jơh priă tă là 720 tơlak đông.