Ngai òr (22/11), Mpồl kwang bàng Quốk hội càr Dăk Lăk bơyai lơh pơrjum tìp mờ cau tĕ khà tơnơ̆ mờ pơrjum dơ̆ 4, Quốk hội khoă 15. Kwang atbồ Ƀan Zân vận Dà lơgar mò Bùi Thị Minh Hoài neh tìp mờ cau tĕ khà tàm kơnhoàl Cư̆ Mgar mờ ƀòn dờng Buôn Ma Thuột.

Tàm ală anih tìp, cau tĕ khà tơlik nùs nhơm chờ hờp tềng đăp mờ ală cồng nha neh lơh geh tàm pơrjum dơ̆ 4, Quốk hội khoă 15. Kwơ màng, Quốk hội neh ring bal Nghị quyết bè tơrlòng lơh ờ uă kơrnoăt, broă lơh krơi is tơnguh bơtàu ƀòn dờng Buôn Ma Thuột. Tàm dơ̆ tìp, cau tĕ khà kung neh dan ală tơngu me gơrềng bal tus mờ broă dong kờl cau geh màng mờ dà lơgar, bơsong ală broă lơh tìs ƀảo hiểm y tế ai hìu rơƀah in, broă phơng sih ờ ngan ờ niam lơh gơrềng tus mờ cồng nha phan tam, gùng lòt tàm ƀòn gơtìp tơrlah, pal geh broă sền gròi mờ bơcri priă lơh niam wơl.