VOV4.K’ho- Drim ngai 16/05, tàm Hìu lơh broă Củ tịc, Củ tịc lơgar ồng Nguyễn Xuân Phúc neh đơng lam dơ̆ wă rò ngan ngồn Kwang atbồ lơgar Hy Lạp mò Katerina Sakellaropoulou sơnđờm còp ngan ngồn lơgar Việt Nam bơh ngai 15 tus ngai 19 nhai 5  jat jơnau jà bơh Ủy viên Ƀộ Cíñ trị, Củ tịc lơgar ồng Nguyễn Xuân Phúc dê.

Củ tịc lơgar ồng Nguyễn Xuân Phúc mờ Kwang atbồ lơgar Hy lạp

Tàm tơngume dơ̆ còp, Kwang atbồ lơgar Hy Lạp geh ơn guàng bơkào tàm Anih kah kơlôi ală cau ling khin cha jak chài chơ̆t màng; ơn guàng bơkào mờ mut tàm Gơlang ƀồc iês ƀồc Củ tịc Hồ Chí Minh; còp să Tổng Ƀí thư ồng Nguyễn Phú Trọng; tìp mat cribơyai mờ Củ tịc Quôk hội ồng Vương Đình Huệ; tus bal dơ̆ kĭ Sră nggal mờ tìp mat mờ cau lơh băo; tus sền Văn Miếu mờ tus bal bàr pe broă lơh tàm ală tiah. Dơ̆ lòt còp bơh mò dê pơgồp bơnah bơtàu tơnguh bơta pin dờn cíñ trị, lơh jrô ơnàng rlau tai gĭt gơ̆p lơh broă bal uă gah bè cíñ trị- lơh broă mờ lơgar ndai, lơh sa, niam chài, nhơl chờ ai bơta gĭt gơ̆p 2 gah gơ mut tàm bơta ngan ngồn mờ geh cồng nha rlau tai.

 Cau mblàng K’Hạnh