Dờp jơnau jà bơh Củ tịc lơgar ồng Võ Văn Thưởng, ngai do, 21/08, Kwang atbồ lơgar Kazakhstan ồng Kassym-Jomart Tokayev sơnđờm lòt còp ngan ngồn lơgar Việt Nam. Do là dơ̆ sơn rờp Kwang atbồ lơgar Kazakhstan ồng Tokayev tus lơgar Việt Nam tàm gơnoar broă pa, kung là dơ̆ sơnrờp bơh dùl nă Kwang atbồ lơgar Kazakhstan tàm 12 nam do, geh gơtha kwơ màng ngan sơlơ tơnguh rlau tai bơta gĭt gơ̆p lơh broă bal, lơh bơyô bal đah Việt Nam mờ Kazakhstan, ngan là bè lơh sa mờ kă bro.

Tàm dơ̆ lòt còp do, 2 gah rơ̆p kĭ hơ rlau 10 jơnau ring bal, tàm hơ̆ pal đơs tus Broă rơndăp lơh pơgồp bal lơh broă nàng kờñ sơlơ bơtàu tơnguh lơh broă bal lơh sa- kă bro. Bal mờ hơ̆ là jơnau ring bal bè broă lơh ơduh pal geh sră lòt rê ai làng bol 2 lơgar in. Drim ngai 20/8, Kwang atbồ lơgar Kazakhstan tus ơn guàng bơkào tàm Anih kah kơlôi ală cau ling khin cha jak chài, cau ling chơ̆t màng mờ ơn guàng bơkào tàm Gơlang ƀồc Củ tịc Hồ Chí Minh dê. Tơnơ̆ dơ̆ wă ngan ngồn tàm Hìu duh broă Củ tịc, Củ tịc lơgar ồng Võ Văn Thưởng mờ Kwang atbồ lơgar Kazakhstan lơh dơ̆ cribơyai.