Dơ̆ lòt còp do ờ mìng là dùl broă cribơyai mờ lơgar ndai kuơmàng mờ gam ai tơnggŏ bơta ki ngàm mờ jơnau hơ pơrgon bơh Nga dê gơ wèt mờ bơta git gơp lơh broă bal uă gah mờ Việt Nam. Bal mờ hơ̆, dơ̆ lòt còp kung ai gŏ Việt Nam jơh nùs lam lơh jat gùng dà lơh broă mờ lơgar ndai jat nùs nhơm lơngap lơngai is, lơh tờm is, li la bơta git gơp, lơh broă bal uă lơgar, tài bơta kuơ dà lơgar, jơi bơtiàn mờ tă pơgồp tàm ring lơngai, kơ̆ kơljap tàm dunia.

Tàm dơ̆ lòt còp bơh ồng Putin dê, kwang đơng lam bồ 2 lơgar rơp cribơyai mờ ai tơlik lài gùng dà ai bơta git gơp lơh broă bal kuơmàng tơl làm tus nam 2030, git loh rlau tai ală gah lơh broă bal tờm, bơh lơh sa, kă bro, sền gàr dà lơgar, sền gàr lơngap lơngai, năng lượng, khoa họk kông nghệ tus bơto bơsram, niam chài, cribơyai broă mờ lơgar ndai làng bol. Ală jơnau kờñ jŏ tơngai mờ broă rơndap lơh ngan ngồn rơp geh ai tơlik, nàng kờñ gàr niam bơta bơtàu tơnguh kơ̆ kơljap mờ geh cồng nha bơh bơta git gơp 2 gah tàm tơnơ̆ do.