Drim ngai 24/11, tàm hìu lơh broă Củ tịc, Củ tịc lơgar ồng Nguyễn Xuân Phúc neh đơng lam dơ̆ wă rò mờ tìp mat cribơyai broă mờ Kwang atbồ lơgar Uganda ồng Yoweri Kaguta Museveni. Tàm dơ̆ tìp mat cribơyai broă, 2 nă kwang đơng lam bồ đơs nền bơta lơh ngan sơlơ tơnguh lơh broă bal lơh sa, tơnguh priă lơh geh bơh kă bro đah 2 lơgar gơ in dipal mờ bơta git gơp cíñ trị mờ bơta dờng pràn bơh 2 rài lơh sa dê.

Bàr nă kwang đơng lam bồ đơs nền bơta kuơmàng bơh lơh broă bal lơh sa dê, sền do là dùl tàm ală bơta tờm bơh lơh broă bal 2 gah dê nàng kờñ pơgồp bơnah gàr tơl phan sa dà lơgar mờ gùt plai ù bơh ală broă lơh broă bal 2 gah halà uă gah mờ bơta tus bal bơh ală lơgar lơh broă bal bơtàu tơnguh dê. Tơnơ̆ dơ̆ tìp mat cribơyai broă, Củ tịc lơgar ồng Nguyễn Xuân Phúc mờ Kwang atbồ lơgar Uganda ồng Yoweri Kaguta Museveni neh sền dơ̆ kĭ sră nggal lơh broă bal tàm 2, 3 gah broă lơh.