VOV4.K’ho - Mho òr (26/01), mò Trương Thị Mai, Kwang geh jơng tàm Ƀộ Cíñ trị, Ƀí thư Đảng dà lơgar, kwang atbồ Mpồl Rơndăp broă Dà lơgar bal mờ mpồl kwang bàng lơh broă neh tus còp, chờ gờm satềp kwang bàng, cau ling bal mờ làng bol ală kòn cau tàm kơnhoàl tiah nhàr dà lơgar Nậm Pồ, càr Điện Biên.

Mpồl kwang bàng lơh broă neh pà rơlao 140 pò phan satềp ai ală hìu nhă cau ling chơ̆t màng, kơnòm bơsram geh rài kis gơtìp kal ke; hìu nhă geh sră dong kờl bơh dà lơgar, hìu rơƀah, cau geh bơngă pin dờn tàm mpồl bơtiàn; kwang bàng, công chức, cau lơh broă geh rài kis gơtìp kal ke tàm kơnhoàl Nậm Pồ; pà phan kấp ủy, gơnoar atbồ xã Si Pa Phìn mờ Đảng ƀộ kơnhoàl Nậm Pồ.

Còp, chờ gờm satềp kwang bàng, cau ling tàm pôs ling sền gàr tiah nhàr dà lơgar Si Pa Phìn mờ mpồl lơh sa sền gàr dà lơgar 379 gơwèt Quân khu II, kwang atbồ Mpồl Rơndăp broă Dà lơgar mò Trương Thị Mai dùl dơ̆ tai đơs tờm gơnoar tờm bơh mpồl ling tàm kơnhoàl tiah nhàr dà lơgar tàm broă gàr niam broă sền gàr bơta lơngăp lơngai ờ do ờ dă, gàr niam gơnoar tờm ù tiah, bơta lơngăp lơngai tàm tiah nhàr dà lơgar; lơh jăt niam broă rơcang sơndră mờ kòp Kovid-19, tam dră mờ cau lik mŭt tàm lơgar ờ di mờ adăt boh lam, cau tìs ma túy mờ ală bơta tìs ndai nàng làng bol wă rò nam pa satềp chờ hờp.

Cau mblàng Ndong Brawl