Mho ngai 17/5, tàm Hìu lơh broă Đảng dà lơgar, mò Trương Thị Mai, Ủy viên Ƀộ Cíñ trị, Thường trựk Ƀan Ƀí thư neh wă đềt mềr Mpồl kwang bàng kâp dờng Ủy ƀan sền gàr kac màng lơgar Cuba bơh ồng Gerardo Hernandez Nordelo, Ủy viên Đảng Kộng sản lơgar Cuba, Ủy viên Mpồl duh broă dà lơgar Kộng hòa Cuba, Củ tịc Ủy ƀan sền gàr kac màng Cuba lơh kwang atbồ mpồl lòt còp mờ lơh broă tàm lơgar Việt Nam.

Mò Trương Thị Mai đơs nền, Đảng, Dà lơgar mờ làng bol Việt Nam sùm lòt bal mờ kờñ sơlơ tơrbŏ kơ̆ rlau tai bơta git gơp tam klac, lơh bơyô kuơmàng mờ Đảng, dà lơgar mờ làng bol Cuba oh mi, ai bơta git gơp đah 2 lơgar ngai sơlơ bơtàu tơnguh, ngai sơlơ niam rlau tai tàm tŭ tơngai pa. Bal mờ hơ̆ ồng Gerardo Hernandez Nordelo đơs nền nùs nhơm tam klac, đềt mềr mờ bơta sền ngềr bơh làng bol Cuba dê gơ wèt mờ krơh niam kơ̆ dơn, khin cha jak chài bơh làng bol Việt Nam dê tàm dơ̆ tam lơh tơngklàs jơi bơtiàn lài do mờ broă lơh bơtàu tơnguh tŭ do.