VOV4.K’ho-  “Ngai lài he mìng geh mang mờ brê. Ngai do he geh ngai, geh trồ tiah, geh dà lềng. Dà lềng he dê jòng, niam bơnĕ ngan, he pal gĭt sền gàr tĕ gơ”. Jơnau bơto tơngkah Củ tịc Hồ Chí Minh dê tŭ rê còp mpồl ling dà lềng nhai 3 nam 1961 sùm geh tơl nă kwang bàng, cau ling Ling dà lềng đơs bal, kwang bàng, cau ling Tiah 4 Ling dà lềng đơs is cih kah, là phan sơnnio gùng ai tơl broă lơh in. Bơsram, lơh jat Bác Hồ, tơl nă kwang bàng, cau ling Tiah 4 Ling dà lềng neh geh uă broă lơh pa, broă lơh niam, bơceh pa, geh cồng nha, geh bơta lơh gơ rề uă, jrô ơnàng, geh ngui tàm bơta geh ngan cèng wơl cồng nha uă tàm broă lơh jat kơnòl broă pơlam tàp rcang lài tam lơh, sền gàr kơ̆ kơljap gơnoar tờm dà lềng, ƀồt bơlào dà lềng bơh dà lơgar dê.

Tìp mat Trung úy Nguyễn Đình Lương, Nghiệp vụ trưởng Phău ơhò, Phòng Tham mưu, Lữ đoàn 162 tŭ bi gam yal phần mềm “broă lơh, lơh niam bơta chài anih cuh phău AK-176 tàm ơ hò 12418” ai ală kwang bàng, cau ling tàm ơhò in... Do là phần mềm bơh bi dê kơlôi sơnơng mờ neh tơmut ngui tàm ơhò phàu ồs sò tơm mhar 12418 lơh geh cồng nha uă. Bi Lương pà gĭt, geh bơh bơta geh ngan kơnòl broă tàm tŭ lơh broă tàm ơ hò, gah lơh broă ờs mờng phău AK176 là mpồl phău pa geh crăp tàm uă khà ơhò dê. Sền gŏ broă bơsram kơlôi sơnơng sră pơ àr mờ ală phần mềm lơh rùp, broă lơh bơsram yau ờ ƀuơn, lơh geh bơta sền gĭt niam ngan mờ dong mpồl ling ƀuơn ngan kơlôi sơnơng, wă wờng jơnau gĭt wă mhar rlau. Den tàng tơnơ̆ 3 nhai lơh ngan kơlôi sơnơng, lòt gan uă bơta kal ke, bi neh lơh gơlik geh phần mềm dong mpồl ling in ƀuơn kơlôi sơnơng mờ mut ngui tàm tŭ lơh broă, prap gàr ală bơta phàu crong tàm ơhò, drơng broă lơh pơlam tàp mờ lơh tờm mpồl phăo AK 176 dê. Phần mền neh lơh geh khà A khà jờng rơnàng kơnòm să bơceh pa Nguyễn Phan Vinh nam 2021 bơh Quân chủng Ling dà lềng dê.

Trung úy Nguyễn Đình Lương đơs: Să tờm añ sùm sền gĭt nàng lơh tờm ală ơhò tam lơh pa den pal bơceh pa, khin kơlôi, khin lơh. Tàm tơngai tus să tờm añ pơn jat tai gàr kơ̆ mờ lơh jat ală cồng nha neh lơh geh, lơh ngan bơsram sră, tơnguh uă bơta kơ̆ dơn cíñ trị, bơta chài ờs mờng bè tơl gah, lơh sir niam tơl kơnòl broă tàm gơnoar broă lơh broă dê. Lơh jat niam bơta lam lài, bơceh pa bơh rơnàng kơnòm să dê, pơn jat tai kơlôi sơnơng khoa họk, bơceh lơh lơh gơlik, ngui kông nghệ tàm broă lơh pơlam tàp pơgồp bơnah bơt bơtàu Lữ đoàn 162 Kăc màng, cíñ quy, sơr băc mhar, pa ngan di pal mờ jơnau sồr sền gàr kơ̆ kơljap gơnoar tờm dà lềng, ƀồt bơlào dà lềng, bơnah ù gờl dờng màng tàm dà lềng bơh dà lơgar dê tàm tơngai pa.

Jơnau hơ sơn tơm să cau ling pa tàm Anih tờm pơlam tàp Tiah 4 Ling dà lềng

Lơh jat Cỉ thị sồ 05 bơh Ƀộ Cíñ trị dê bè “Lơh pràn bơsram sră mờ lơh jat ƀồ tơngoh, nùs nhơm mờ rài kis Hồ Chí Minh dê” tàm Tiah 4 Ling dà lềng neh geh uă cau pơn rơ jak mờ broă lơh pa, bơceh pa, geh cồng nha tàm tơl gah broă lơh. Tàm gơnoar broă là Cau dong broă Ban Quân Khí, Phòng Kỹ thuật, Thượng úy Trần Công Tạo neh sùm kơlôi sơnơng, tă pơgồp ală jơnau bơceh lơh, lơh pa măy mok, pơgồp bơnah tàm broă tơnguh uă cồng nha ngui phàu crong rcang lài pa geh tàm mpồl ling dê. Pơn rơ bè jơnau bơceh lơh “Động kơ dong kờl quay phan cuh mền dà tàm ơhò Gepard 3.9”, jơnau bơceh lơh neh geh jờng rơ uă bè bơta lơh geh cồng nha tàm broă lam lơh ngui tàm bơta geh ngan. Jơnau bơceh lơh do neh geh khà dùl dơ̆ pơrlòng “Rơnàng kơnòm să bơceh pa gùt mpồl ling dê”.

Thượng úy Trần Công Tạo đơs: Do là dùl phan bơna geh mòn lơh, lơh gơlik pa mờ jơnau kờñ dong tàm tŭ mut ngui, ngui mpồl cuh tàm ơhò, dong tơnguh uă bơta pràn rcang lài tam lơh bơh phan cuh dê; dong kờl broă lơh pơlam tàp, pơlam tàp tam lơh mơkung tơrmù broă lơh bòl glar să jan bơh ling geh griăt dê tàm tŭ ngui phàu crong rcang lài. Să tờm añ sùm pơnđơl pràn lơh ngan bơsram, tơnguh uă bơta chài broă lơh ờs mờng, jòi gĭt phàu crong tang vị, kông nghệ pa bơh hơ̆ sac rơ wah kơlôi sơnơng, ngui tàm bơta geh ngan, di pal mờ jơnau kờñ kơnòl broă  ngai sơlơ uă pơgồp bơnah tàm broă sền gàr gơnoar tờm dà lềng, ƀồt bơlào dà lềng tàm bơta pa.

Cau ling, kwang bàng Tiah 4 Ling dà lềng ơm gak sền gàr dà lềng, bồt bơlào dà lềng

Gơ wèt mờ ală cau ling gam lơh jat kơnòl broă tàm bồt Trường Sa, ngài ù gờl, ală bơta gam kal ke uă ngan mơya tơl nă kwang bàng, cau ling sùm cih kah jơnau bơtê bơh Bác Hồ dê, Trung tá Phạm Quốc Hùng, kwang bàng bồt Sơn Ca, Lữ đoàn 146 yal: Tơl nă kwang bàng, cau ling tàm bồt bơsram mờ lơh jat krơh niam nùs nhơm rài kis Hồ Chí Minh dê tàm ală broă lơh ngan ngồn pah ngai tơn. Bơh broă tềm pềr ồs đèng, dà ngui tus broă tam biăp, sơng ka sền gàr tờm chi tàm bơnàng bràs mờ san hô halà gĭt loh broă gùng lòt nàng pơlam làng bol lơh ka in tơn hào phan tàm dà lềng ờdo ờdă. Mờ kơnòl broă sền gàr gơnoar tờm dà lềng, bồt bơlào dà lềng, tơl nă kwang bàng, cau ling bơt bơtàu nùs nhơm gĭt wă lơh is tàm broă pơlam tàp, lơh jat bơta lơh glài, jat sền nền broă lơh geh ngan tàm mpồl ling, jơnau đơs lòt bal mờ lơh.

Trung tá Phạm Quốc Hùng đơs sùm: Lơh jat jơnau bơto bơtê bơh Bác Hồ dê, tơngai pa do, să tờm añ neh bal kwang bàng, cau ling tàm mpồl ling sùm lơh ngan bơsram, tơnguh uă bơta gĭt wă cíñ trị, gĭt wă loh gơwèt mờ cau, cau lơh broă bal mờ ală nùs nhơm, kơrnoat pal jat bơh Đảng, dà lơgar he dê tàm broă lơh jat kơnòl broă tam lơh sền gàr gơnoar tờm dà lềng, bồt bơlào dà lềng. Lơh ngan pơlam tàp, lơh tờm ală bơta  phàu crong rcang lài, pơlam tàp gùng dà broă lơh, rcang sền ngăc uă, bơsong niam ală bơta digơlan gơlik geh, ờ lời gơtìp rơmơ̆p ndơl, nisơna tàm tơl bơta gơlik geh.

Jat Kwang bàng kấp dờng ling dà lềng ồng Ngô Văn Thuân, Chính ủy Tiah 4 Ling dà lềng đơs: Lơh jat Cỉ thị sồ 05 bơh Ƀộ Cíñ trị dê bè “Lơh pràn bơsram mờ lơh jat bồ tơngoh, nùs nhơm mờ rài kis Hồ Chí Minh dê”, ală nam do, Tiah 4 Ling dà lềng neh lơh geh uă cồng nha geh ngan. Uă jơnau bơceh lơh geh ngui tàm bơta geh ngan cèng wơl cồng nha uă tàm broă lơh jat kơnòl broă  pơlam tàp rcang lài tam lơh, sền gàr kơ̆ kơl jap gơnoar tờm dà lềng, bồt bơlào dà lềng bơh dà lơgar dê. Ồng Ngô Văn Thuân đơs: Pal đơs ngan là tơngai pa do broă bơsram bồ tơngoh, nùs nhơm mờ rài kis Hồ Chí Minh Tiah 4 Ling dà lềng dê geh bơta lơh gơ rề uă, gơ hòi gơ jà uă ngan kwang bàng, cau ling tus bal. Cồng nha bơh ală broă lơh geh mut ngui mờ lam lơh jat tàm bơta geh ngan neh lơh geh bơta gơn kơ nờm sơlơ kơlôi sơnơng, bơceh pa bơh kwang bàng, cau ling tàm mpồl ling dê, bơh hơ̆ pơgồp bơnah tơnguh uă bơta niam pơlam tàp, rcang lài tam lơh tàm jơh Tiah dê. Tơl nă kwang bàng, cau ling Tiah 4 Ling dà lềng geh kơ̆ dơn cíñ trị, kơ̆ kơl jap, khin kơlôi, khin lơh, khin kong kơnòl, khin bơtàu tơnguh uă, bơceh pa, lơh ngan sền gàr kơ̆ kơljap gơnoar tờm dà lềng, bồt dà lềng bơh Dà lơgar dê.

Cih kah jơnau bơtê Bác Hồ dê “Ngai lài he mìng geh mang mờ brê. Ngai do he geh ngai, geh trồ tiah, geh dà lềng. Dà lềng he dê jòng, niam bơnĕ ngan, he pal gĭt sền gàr tĕ gơ”, tơl nă kwang bàng, cau ling Tiah 4 Ling dà lềng sùm lơh ngan mờ bơsram. Tàm khát dùl bơta lơi kung sùm tam klăc bal, bơsong bơta kal ke, rcang lài tam lơh chơ̆t phi să nàng sền gàr kơ̆ kơljap gơnoar tờm dà lềng, bồt bơlào dà lềng, bơnah ù gờl tàm dà lềng dờng màng bơh dà lơgar dê.

Cau mblàng K’Hạnh