Bal mờ ală mpồl broă lơh bè tơnguh tă kes priă Dà lơgar, gơhòi gơ jà bơcri priă, bơcri, bơtàu tơnguh rơndăp tăp sèng tàm tơrbŏ phan bơna gùng lòt, ngui niam ală bơta pràn, bơta tơl pràn, bơta ƀươn bơh tơl tiah dê, ală kwang bàng đơs là, càr Dăk Lăk pal sền gròi rlau tai tus broă lơh jơi bơtiàn, pin dờn jăt yàng.

Tàm pơrjum dơ̆ 06, Hội đồng Ñân zân càr Dăk Lăk khoă X, ală kwang bàng kung lời uă tŭ jiơ nàng kờñ cribơyai bè broă lơh pràn broă lơh mpồl bơtiàn lơh bal bơto bơtê; ai khà cau lơh broă sa priă nhai dà lơgar dipal ai tơl anih lơh broă, tơl tiah in, kơlôi sơnơng, sơlơ tơnguh tai ală broă lơh nàng kờñ pơn jăt tai tơnguh uă cồng nha bơh broă lơh bơ̆t bơtàu ƀòn lơgar pa; pơn jăt tai lơh geh ală phan bơna OCOP bơkah pơnrơ is, mùl gŏ is bơh ƀòn lơgar dê nàng kờñ pơn jăt tai tăc geh cồng nha tàm drà kă bro tàm lơgar mờ lơgar ndai.