Tàm pang sră, Tổng Ƀí thư, Củ tịc lơgar Lào ồng Thongloun Sisoulith đơs tờm broă ồng Võ Văn Thưởng geh pồ guh at gơnoar broă Củ tịc lơgar tơlik nùs nhơm pin dờn bơh Đảng, Dà lơgar bal mờ Làng bol lơgar Việt Nam dê gơwèt mờ ồng Võ Văn Thưởng; đơs tờm geh sùm rơcang lài lơh broă bal nàng pơgồp bơnah tàm broă tơnguh nùs nhơm git gơ̆p, lơh bơyô bal kwơ màng, tam klăc bal kwơ màng, lơh broă bal tơl ală bơta, oh mi bal đah bàr Đảng, bàr Dà lơgar bal mờ Làng bol bàr lơgar.

Jơnau đơs tàm điện thoại bơh Củ tịc lơgar Lo ồng Tập Cận Bình đơs tờm, lơgar Lo mờ lơgar Việt Nam là bàr lơgar rềp bal, git gơ̆p lơh bơyô bal xã hội củ nghĩa. Củ tịc lơgar Lo ồng Tập Cận Bình tơlik nùs nhơm sền kwơ uă bơta git gơ̆p đah lơgar Lo mờ lơgar Việt Nam, tŭ lơi kung rơcang lơh ngan bal mờ Củ tịc lơgar ồng Võ Văn Thưởng nàng lơh pràn bơta git gơ̆p đah bàr lơgar pơn jăt tai tơnguh bơtàu kơl jăp mờ niam pràn.