Tàm sră pơyua nting bơr gờm chờ, Thủ tướng lơgar Singapore pin dờn là, bơta git gơp jơh nùs đah Singapore mờ Việt Nam rơp pơn jat tai geh sơlơ tơnguh tai tềng đap bơta đơng lam bồ bơh Tổng Ƀí thư, Củ tịc lơgar ồng Tô Lâm dê. Kwang gơnoar cih Đảng lơh broă làng bol lơgar Singapore ồng Lý Hiển Long đơs nền, sùm kờñ bal mờ Việt Nam git ală tŭ niam lơh sa mờ kuơmàng tàm tiah do, sơlơ tơnguh tai lơh broă bal mờ lơh niam rlau tai bơta git gơp đah 2 Đảng, tơnguh bơta git gơp đah 2 gah tus bơta pa.

Thủ tướng lơgar Australia nting bơr gờm chờ ồng Tô Lâm geh pồ at gơnoar broă Tổng Ƀí thư Mpồl duh broă Đảng Kộng sản Việt Nam, đơs nền Australia mờ Việt Nam là ală bơyô kơ̆ kơljap jŏ jòng, bơta git gơp 2 lơgar geh bơnàng jă là bơta git gơp kơ̆ kơljap đah làng bol 2 lơgar mờ bơta pin dờn cíñ trị jŏ jòng. Đảng Kộng sản Mỹ đơs nền, git wă niam ngan bơh Tổng Ƀí thư, Củ tịc lơgar ồng Tô Lâm dê bè ală jơnau tàm sră pơ àr bơh sơn rờp ngan bơh củ nghĩa Mác- Lênin mờ ală broă lơh bơh Đảng Kộng sản Việt Nam dê neh đal git lài mờng chài đơng lam bồ bơceh lơh mờ krơi is ồng dê, pơgồp bơnah bơt bơtàu Việt Nam gơ gơs dùl mpồl bơtiàn pa, geh rài lơh sa drà kă bro jat gùng dà xã hội củ nghĩa, dùl lơgar lơh krơh lài mờ rài kis ngai sơlơ bơtàu tơnguh rlau.