Tổng Ƀí thư, Củ tịc lơgar Lào ồng  Thongloun Sisoulith chờ hờp ngan mờ chờ gờm ồng Tô Lâm di tàm dơ̆ ồng geh pồ at gơnoar broă Củ tịc lơgar Kộng hòa xã hội củ nghĩa Việt Nam tàm Pơrjum dơ̆ poh, Quốk hội khoă XV, ai tơngŏ nùs nhơm pin dờn mờ đơs niam Đảng, Dà lơgar bal mờ Làng bol lơgar Việt Nam dê lời ai ồng in.

Củ tịc lơgar Lo ồng Tập Cận Bình kung chờ gờm ồng Tô Lâm geh pồ lơh Củ tịc lơgar Kộng hòa xã hội củ nghĩa Việt Nam sơl. Mờ tơlik nùs nhơm sền kwơ uă ngan bơta git gơ̆p đah lơgar Lo mờ lơgar Việt Nam dê, tŭ lơi kung rơcang nàng bal mờ Củ tịc lơgar ồng Tô Lâm geh sùm broă tàm pơgơl bal kwang bàng kâp dờng lòt còp bal mờ gơ̆p, tề lam broă bơ̆t bơtàu Mpồl bơtiàn tam pà bal rài tơnơ̆ do đah lơgar Lo mờ lơgar Việt Nam geh mŭt lơh ngan ngồn tàm uă gah broă mờ mùl màl, chờ gờm ồng Củ tịc lơgar lơh geh cồng nha dờng rơlao tai tàm gơnoar broă pa. Bơtau lơgar Campuchia chờ gờm Củ tịc lơgar ồng Tô Lâm neh geh Quốk hội lơgar Kộng hòa xã hội củ nghĩa Việt Nam pồ at gơnoar broă Củ tịc lơgar mờ pin dờn là tềng đăp mờ broă đơng lam bơh ồng Củ tịc lơgar dê, lơgar Kộng hòa xã hội củ nghĩa Việt Nam rơ̆p lơh geh uă cồng nha dờng rơlao tai, geh bơta bơtàu tơnguh mhar rơlao tàm ală gah broă mờ geh sùm gơnoar kwơ màng tàm tiah do mờ tàm dunia.