Pơyua ală jơnau chờ gờm niam bơnĕ tus mờ jơh ală mpồl cau lơh sơnơm di Ngai Cau Lơh sơnơm Việt Nam dê, ồng Nguyễn Trọng Nghĩa đơs loh, pa do Đảng Dà lơgar mờ Quôk hội geh uă Kơrnoăt bè sền gàr niam rài kis mpồl bơtiàn, broă lơh lơh sơnơm, sền gròi trang gàr pràn kơldang să jan làng bol in. Tàm hơ̆, Kơrnoăt Dà lơgar 8 bè tam gơl pa tơnguh uă cồng nha broă lơh dong kờl mpồl bơtiàn neh lời ai bơta sền gròi uă ngan gơ wèt mờ sền gàr dong kờl lơh sơnơm.

Lơh jăt ngan ngồn jơnau kờñ bơh Cíñ phủ dê là wèt tus bơta niam nùs bơh làng bol dê, ồng Nguyễn Trọng Nghĩa kơ̆p kờñ Hìu sơnơm Tàp pràn să jan Việt Nam mờ Hìu sơnơm Tâm Anh tàm Hà Nội tơnguh uă nùs nhơm cau lơh sơnơm dê, lơh jăt niam jơnau đơs lơh niam nùs cau kòp in, kham sơm kòp mờ bơta niam uă ngan rlau jơh, lơh geh jơnau kờñ bơh làng bol dê. Kung tàm dơ̆ do sơl, mpồl kwang bàng bơh Mpồl duh broă sùm Ƀan Tuyên zăo Dà lơgar neh lòt còp mờ chờ gờm kwang bàng, cau lơh sơnơm mờ cau lơh broă tàm Hìu sơnơm Bạch Mai.