Ala mat Kwang đơng lam bồ càr Dăk Lăk, ồng Nguyễn Tuấn Hà, Phó Củ tịc Duh broă sùm Ủy ƀan Ñân zân càr pơyoa jơnau hờn chờ niam bơnĕ ngan tus mờ kwang bàng, kông cứk, viên cứk, cau lơh broă bơh Anih jơnau đơs Việt Nam Anih lơh broă sùm tiah Tây Nguyên, hờn chờ ală cồng nha lơh jat kơnòl broă yal jơnau, mblàng yal mờ Anih jơnau đơs Việt Nam đơs bal mờ Anih lơh broă sùm tiah Tây Nguyên đơs is neh lơh geh tàm tơngai pa do.

Phó Củ tịc Ủy ƀan Ñân zân càr Dăk Lăk kơ̆p kờñ, tàm tơngai tus, Anih lơh broă pơn jat tai cih yal ală bơta niam, mơkung tă pơgồp jơnau đơs bơt bơtàu ală bơta ờ hềt lơh geh, dong càr ngai sơlơ bơtàu tơnguh niam rlau tai. Nam 2024 do, tơngkah kir sơnrai 120 nam crơng gơs, bơtàu tơnguh càr Dăk Lăk, ồng Nguyễn Tuấn Hà neh sồr VOV- Tây Nguyên yal uă rlau tai bè ală cồng nha lơh geh, tŭ tơngai tam gơl pa, ală bơta pơnđơl pràn lơh ngan bơh ală tiah dê bơt bơtàu càr Dăk Lăk ngai sơlơ niam jak, pa ngan, bềng bơhiàn niam chài niam bơnĕ.