Ală kwang bàng đơng lam bồ, lài do là Kwang đơng lam bồ Đảng, Dà lơgar, Mặt trận Dà lơgar Việt Nam neh lòt gùt dar ƀồc, ngoh rơngăc tơngăc Tổng Ƀí thư ồng Nguyễn Phú Trọng- Kwang đơng lam bồ jak chài is ồn ngan, dùl nă krơh niam àng sơrdah ngan bè bơsram, lơh jat bồ tơngoh, nùs nhơm, rài kis mờ broă lơh Hồ Chí Minh dê, cau đảng viên kộng sản jơh nùs dòn song, geh bơngă pin dờn dờng bơh Đảng, Dà lơgar mờ làng bol he dê, geh tơl làm nùs nhơm, jak chài, khin cha, bồ tơngoh jak chài bơh rơnàng kwang đơng lam bồ lơgar Việt Nam rài tam gơl pa.

Mờ bơta kah sơnđàc pơlai soh uă ngan, Kwang bàng Ƀộ Cíñ trị, Củ tịc lơgar ồng Tô Lâm cih tàm sră ƀồc: “Jơh nùs kah sơnđàc pơlai soh ngan Tổng Ƀí thư ồng Nguyễn Phú Trọng- Cau kòn kờñ gơboh bơh jơi bơtiàn Việt Nam dê, Kwang đơng lam bồ is ồn jak chài uă ngan, cau đảng viên Kộng sản dùl nùs dòn song, dùl krơh niam àng sơrdah sùm bơsram, lơh jat bồ tơngoh, nùs nhơm, broă lơh mờ rài kis Hồ Chí Minh dê, geh bơngă pin dờn dờng bơh Đảng, Dà lơgar mờ Làng bol he dê, cau bơyô dờng bơh làng bol dunia dê; cau neh lời jơh rài kis he dê, jơh nùs jơh tồr, tă pơgồp jơh ai Dà lơgar, ai Đảng mờ ai làng bol in; geh uă dà kơl hề mờ tă pơgồp dờng ngan ai broă lơh kăc màng bơh Đảng mờ jơi bơtiàn, ai srơh Kộng sản ală lơgar mờ gàr sùm ring lơngai, kơ̆ kơl jăp, bơtàu tơnguh tàm tiah do mờ tàm dunia. Jơh nùs kun bồ he dê tềng đăp rùp hin bơh ồng dê, bol añ dan lơh is bơsram, lơh jat krơh niam bơh ồng dê, jơh nùs, jơh bơta pràn drơng broă Dà lơgar, drơng broă làng bol, tam klăc bal, dùl nùs bal, pơnđơl pràn lơh ngan lơh jat geh cồng nha jơnau kờñ bơt bơtàu Dà lơgar Việt Nam ring lơngai, lơngăp lơngai is, tơrgùm dùl, làng bol lơh tờm, pas pràn, niam jak, hờn chờ mờ Ồng jơh rài kis he dê kơ̆p kờñ, pơnđơl pràn lơh ngan phi să”.

Tàm drim ngai 25/07, uă mpồl kwang bàng ală lơgar, ală ƀộ, mpồl, gah broă, ală càr, ƀòn dờng jơh gùt lơgar mut ies ƀồc Tổng Ƀí thư ồng Nguyễn Phú Trọng mờ tam pà bal muat jrùm bal mờ hìu bơnhă.