VOV4.K’ho- Tơngkah kir sơnrai 75 nam Ngai Cau ling sồt să- Cau ling chơ̆t màng, drim ngai 26/07, mpồl kwang bàng ala măt Ƀan Câp hàñ Đảng Dà lơgar, Quôk hội, Dà lơgar, Cíñ phủ, Ủy ƀan Mặt trận dà lơgar Việt Nam neh ơn goàng bơkàu, chu ñàng kah kơlôi ală cau ling khin cha jak chài chơ̆t màng tàm Anih kah kơlôi ală cau ling khin cha jak chài chơ̆t màng (gùng Bắc Sơn, ƀòn dờng Hà Nội) mờ ơn goàng bơkàu, mŭt tàm Gơlăng ƀồc còp ies ƀồc Củ tịc Hồ Chí Minh.

Kwang đơng lam bồ Đảng, Dà lơgar còp ies ƀồc Củ tịc Hồ Chí Minh

Tàm nùs nhơm ki ngàm ngan, jơh nùs ngan, ală kwang bàng ala măt neh kun bồ kah kơlôi ală cau kòn jak chài ngan bơh jơi bơtiàn dê neh tă pơgồp, phi să jơh mhàm ntìng, khin cha jak chài, kơ̆ dơn nùs nhơm, tam lơh, phi să tài broă lơh tam lơh dong klàs jơi bơtiàn, tơrgùm dùl dà lơgar, tơl làm ù tiah, tài củ nghĩa xã hội mờ kơnòl broă dunia dờng màng ngan. Goàng bơkàu bơh mpồl dê cih akhar “Sùm sùm kah ưn ngài ală cau ling khin cha jak chài chơ̆t màng”.

Rùp mòn Kah kơlôi ală cau ling khin cha jak chài chơ̆t màng ngai do geh ơn bềng bơkàu kah kơlôi bơh ală mpồl cau lòt còp ies dê

Kung dùl ngai bal, ală mpồl kwang bàng ala măt Quân ủy Dà lơgar, Ƀộ Quôk phòng; Đảng ủy Kwang àng Dà lơgar, Ƀộ Kwang àng; Ƀộ Lao động, Thương ƀiñ mờ Xã hội; Ƀòn dờng Hà Nội...ală ƀan ngàñ mpồl cau, ală mpồl tàm lơgar mờ dunia neh tus ơn goàng bơkàu, kah kơlôi ală cau ling khin cha jak chài chơ̆t màng tàm Anih kah kơlôi ală cau ling khin cha jak chài chơ̆t màng mờ mŭt tàm Gơlăng ƀồc còp ies ƀồc Củ tịc Hồ Chí Minh.

Cau mblàng Lơ Mu K’Yến