Tềng đap huềng Củ tịc Hồ Chí Minh, Mpồl kwang bàng neh ai tơnggŏ nùs nhơm kah ưn ngài jơh nùs, ki ngàm chu ñàng kah ưn ngài dà kơl hề dờng màng bơh Củ tịc Hồ Chí Minh dê gơ wèt mờ broă lơh kac màng bơh Đảng mờ jơi bơtiàn he dê. Chủ tịc Hồ Chí Minh là cau neh tă pơgồp jơh rài kis ai làng bol, ai dà lơgar in, tề lam Đảng he, làng bol he lơh gơs ală jai pha dờng màng. Giàng bơkàu bơh Mpồl dê geh cih “Sùm sùm kah ưn ngài Củ tịc Hồ Chí Minh dờng màng”. Kah yau dà lơgar sùm cih kah tŭ jơ tàm tŭ 11 jơ 30 phuk ngai 30/4/1975 tŭ nha bồng bi kac màng geh yơr tềng hơđang Hìu kuơ̆ gơlăng Lơngăp lơngai is – do là anih ơm dut ndơl bơh gơnoar atbồ Sài Gòn dê. Bơh do, tiah đah jum neh geh tơngklàs jơh, dà lơgar Việt Nam tơrgùm dùl gùng. 49 nam tơnơ̆ ngai tơngklàs, Việt Nam bơh 1 lơgar rƀah, neh sơrlèt gan git nđờ bơta kal ke, bơta lòng, rơhời lơh geh ală cồng nha dờng màng, gơ gơs là dùl tàm ală lơgar gơ wèt mpồl ală lơgar gơguh lơh sa jơnhua tàm tiah do mờ tàm dunia.