Mờ nùs nhơm kah ưn ngài git lơh, ală kwang đơng lam bồ Đảng, Dà lơgar neh ki ngàm kah ưn ngài Củ tịc Hồ Chí Minh, kwang đơng lam bồ jak chài, cau khin cha jak chài tơngklàs jơi bơtiàn, cau neh tă pơgồp jơh rài kis he dê ai làng bol, ai dà lơgar in, tề lam Đảng he, làng bol he lơh gơlik ală pha lin dờng ngan, lơh àng gơ crà jơi bơtiàn he, dà lơgar he. Guàng bơkàu bơh mpồl dê geh cih “Sùm sùm kah ưn ngài Củ tịc Hồ Chí Minh dờng màng”. Củ tịc Hồ Chí Minh neh sang rài 55 nam, mơya sră cih jơnau nting bơr lời wơl bơh Củ tịc Hồ Chí Minh dê là bơta àng sòl gùng, lơh àng gơ crà ai jơh gùt Đảng, jơh gùt làng bol mờ jơh gùt ling klàng he in kơ̆ dơn cơnđuà lòt tàm gùng kac màng. Lơh jat jơnau nting bơr lời wơl bơh Củ tịc Hồ Chí Minh dê, jơh gùt làng bol, jơh gùt ling klàng he lơh ngan pơn đơl pràn, lơh ngan lơh gơtùi ală jơnau kờñ, kơnòl broă mờ Jơnau lơh nền pơrjum dờng dơ̆ XIII Đảng dê neh ai tơlik.