VOV4.K’ho- Di dơ̆ tơngkah kir sơnrai 132 nam Ngai deh Củ tịc Hồ Chí Minh (19/5/1890-19/5/2022), drim do, 19/05, Mpồl kwang bàng đơng lam bồ Đảng, Dà lơgar mờ Ủy ƀan Mặt trận Dà lơgar Việt Nam neh tus ơn guàng bơkào, mut tàm Gơlang ƀồc iês ƀồc Củ tịc Hồ Chí Minh mờ chu ñàng kah kơlôi ală Cau ling khin cha jak chài chơ̆t màng.

Kwang đơng lam bồ Đảng, Dà lơgar mut tàm Gơlang ƀồc iês ƀồc Củ  tịc Hồ Chí Minh

Tềng đap rùp hin Củ tịc Hồ Chí Minh dờng màng dê, ală kwang bàng đơng lam bồ tơngŏ nùs nhơm gĭt ưn ngai uă ngan rlau jơh, nùs nhơm ki ngàm kah kơlôi dà kơl hề dờng màng bơh Củ tịc Hồ Chí Minh dê gơwèt mờ broă lơh tam lơh tơngklàs jơi bơtiàn, tơrgùm dùl dà lơgar, bơt bơtàu dà lơgar Việt Nam Xã hội Củ nghĩa ring lơngai, lơngap lơngai is, tơrgùm dùl. Guàng bơkào bơh Mpồl kwang bàng dê cèng cih akhar “Sùm sùm kah ưn ngài Củ tịc Hồ Chí Minh dờng màng”.

Guàng bơkào bơh mpồl Kwang bàng dê

Tơnơ̆ tŭ mut tàm Gơlang ƀồc iês ƀồc Củ tịc Hồ Chí Minh, Mpồl neh tus còp mờ ơn guàng bơkào, chu ñàng, kah kơlôi ală Cau ling khin cha jak chài chơ̆t màng tàm Anih kah kơlôi ală Cau ling khin cha jak chài chơ̆t màng tàm gùng Bắc Sơn. Guàng bơkào bơh Mpồl dê cèng cih akhar “Sùm sùm kah ưn ngài ală Cau ling khin cha jak chài chơ̆t màng”.

Cau mblàng K’Hạnh