VOV4.K’ho- Tàm dơ̆ lòt còp mờ lơh broă tàm lơgar Lào bơh Mpồl kwang bàng đơng lam bồ Anih Cah rña dờng ngan rlau jơh dà lơgar Việt Nam bơh ngai 09- 13/08, ngai 12/08, Kwang ătbồ Anih Cah rña dờng ngan rlau jơh Việt Nam ồng Nguyễn Hoà Bình bal mờ mpồl tus còp să Tổng Ƀí thư, Củ tịc lơgar Lào ồng Thongloun Sisoulith mờ Củ tịc Quôk hội lơgar Lào ồng Saysomphone Phomvihane. Tàm dơ̆ wă, ồng Nguyễn Hoà Bình neh yal mờ Tổng Ƀí thư, Củ tịc lơgar Lào ồng Thongloun Sisoulith in cồng nha dơ̆ cribơyai đah Anih cah rña dờng ngan rlau jơh lơgar Lào mờ Anih Cah rña dờng ngan rlau jơh lơgar Việt Nam dê; cồng nha bơyai lơh pơrjum Anih cah rña ală càr tiah nhàr lơgar bơh pe lơgar: Lào- Việt Nam mờ Campuchia dơ̆ 6 mờ jơnau yal bal đơs nền nùs nhơm bơh ală gah dê tàm broă sơlơ lơh broă bal kơ̆ kơl jăp tàm gah broă lơh anih cah rña pe lơgar.

Tổng Ƀí thư, Củ tịc lơgar Lào tơlik nùs nhơm chờ hờp wă rò mpồl lòt còp mờ lơh broă tàm lơgar Lào dơ̆ do; mơkung đơs sùm, gah anih cah rña lơgar Lào mờ Việt Nam kờñ pal pơgồp bal kơ̆ kơl jăp rlau tai nàng di tŭ bơsong ală broă pa gơlik geh, cèng wơl gơnoar kwơ geh ngan ai làng bol in kung bè bơta pin dờn bơh làng bol dê gơwèt mờ gơnoar ătbồ, kung bè lơh geh bơta pin dờn bơh làng bol dê gơwèt mờ Đảng mờ Dà lơgar.

Cau mblàng Lơ Mu K'Yến