Di dơ̆ dà lơgar bơtau Campuchia crơng gơs Quôk hội khoă 7 mờ Cíñ phủ tơngai lơh broă dơ̆ 7 (bơh nam 2023 tus nam 2028), Thủ tướng Cíñ phủ ồng Phạm Minh Chính neh pơyua sră nting bơr gờm chờ Thủ tướng ồng Hun Manet; Củ tịc Quôk hội ồng Vương Đình Huệ neh pơyua Sră nting bơr gờm chờ Củ tịc Quôk hội ồng Khuon Sudary.

Tàm Sră nting bơr gờm chờ, Kwang đơng lam bồ lơgar Việt Nam ai tơnggŏ bơta pin dờn tềng đap bơta đơng lam bồ bơh Thủ tướng mờ Củ tịc Quôk hội pa dê, lơgar Campuchia rơp pơn jat tai lơh geh uă cồng nha dờng màng tàm broă lơh bơt bơtàu dà lơgar ring lơngai, kơ̆ kơljap mờ bơtàu tơnguh pas sơm, geh gơnoar broă mờ bơngă pin dờn ngai sơlơ dờng tàm tiah do mờ tàm dunia. Kwang đơng lam bồ lơgar Việt Nam kung pin dờn là tàm tơngai tus, bơta git gơp lơgar rềp bal niam bơnĕ, lơh bơyô ờs mờng, lơh broă bal tơl làm, kơ̆ kơljap jŏ jòng đah Việt Nam mờ Campuchia rơp pơn jat tai lơh kơ̆ kơljap mờ bơtàu tơnguh, tài bơta kuơ bơh làng bol 2 lơgar dê, tă pơgồp uă ngan ai mpồl bơtiàn ASEAN in, tài ring lơngai, kơ̆ kơljap mờ bơtàu tơnguh bơh tiah do mờ dunia dê.