VOV4.K’ho- Drim ngai 29/03, Ủy ƀan Ñân zân càr Dăk Lăk bơyai lơh broă lơh tìp măt cribơyai broă mờ ơruh pơnu bal mờ tơngume “ơruh pơnu càr Dăk Lăk sơnđờm mŭt lơh broă, jòi broă lơh broă sa”. Tàm dơ̆ tìp măt cribơyai broă, ală ơruh pơnu neh geh uă jơnau lùp bè ală broă dong kờl lời ai ơruh pơnu in tàm ală tŭ sơnđờm mŭt lơh broă, jòi broă lơh broă sa.

Tơngume tơrgùm bè ală broă priă càn, broă lơh, bơto bơtê broă lơh, lòt lơh broă hờ lơgar ndai, bơto broă lơh ai cau lơh broă ƀòn lơgar in; Ală broă dong kờl lơh gơlik bơta gơn kơnờm nàng bơtàu tơnguh lơh sa tàm đoàn viên ơruh pơnu, ngan là ơruh pơnu jơi bơtiàn kòn cau dùl êt nă cau, cau kuĕt kơltê...Tàm dơ̆ tìp măt cribơyai broă, bal mờ ală jơnau đơs, jơnau dan neh geh cribơyai tơn mờ ơruh pơnu, mò H Yim Kđoh, Phó Củ tịc Ủy ƀan Ñân zân càr Dăk Lăk sồr ală sở, gah lơh broă kâp càr pơn jăt tai geh ală jơnau kơlôi sơnơng, hơ mờ sră pơ àr ală tơngume gam wơl lài mờ ngai 10/04 tus.

Cau mblàng Lơ Mu K’Yến