Ồng Y Luyện Niê Kdăm, cau ala măt Quốk hội khoă X, Ƀí thư Tỉñ ủy lài do càr Dăk Lăk yal, là cau geh uă tam gơl pa pràn kơl dang, ală broă lơh bơh Tổng Ƀí thư ồng Nguyễn Phú Trọng dê ndrờm geh làng bol pin dờn, làng bol gơboh. Ồng Y Luyện Niê Kdăm pà git: “Ồng Nguyễn Phú Trọng roh là roh dùl nă cau kòn jăk Đảng, Dà lơgar mờ làng bol he dê. Tổng Ƀí thư ồng Nguyễn Phú Trọng neh tus còp càr Dăk Lăk, là kwang bàng sền gròi ngan tus mờ làng bol jơi bơtiàn ờ gal cau, rài kis mpồl bơtiàn, broă lơh làng bol dê, hơ̆ là broă geh sền gròi ngan”.

Pơnyờ să ngan tŭ neh geh 2 dơ̆ tìp mờ kŭp rùp mờ Tổng Ƀí thư ồng Nguyễn Phú Trọng tàm ală broă lơh bơh Mpồl tam klăc ală mpồl văn họk nghệ thuật Việt Nam dê, ồng Nguyễn Hồng Chiến, kis tàm sơnah ƀòn Tân Thành, ƀòn dờng Buôn Ma Thuột, càr Dăk Lăk geh nùs nhơm niam bơnĕ ngan mờ nùs nhơm bơh kwang đơng lam đềt mềr, jơnau đơs ờ pơnhừ să, niam. Ồng yal, tơl jơnau đơs, jơnau pơgồp bal bơh Tổng Ƀí thư dê ƀuơn ngan mŭt tàm nùs nhơm, mờ ồng gam kah sùm. Ồng Nguyễn Hồng Chiến pà git: “Jơnau bơto niam bơnĕ ngan tus tŭ do añ kơlôi mờ cau at gai cih cih văn, lơh ƀăo đơs is mờ làng bol đơs bal, hơ̆ là jơnau đơs “Peh đe bañ lơh bơcah khàr. Lơh bè lơi nàng gơsơ̆t geh đe mờ sền gàr niam khàr. Hơ̆ là pal gàr niam bơta kơ̆ kơl jăp”. Cau at gai cih kung pal bơsram mờ đòm jăt jơnau bơto bơh Tổng Ƀí thư dê, lơh bè lơi he tam dră jai mờ bơta ờ niam mơya kung pal cèng geh gùng dà broă lơh ai mpồl bơtiàn in pin dờn mờ Đảng, mờ rài do niam bơnĕ he dê”.

Kah sùm jơnau nting bơto bơh Tổng Ƀí thư ồng Nguyễn Phú Trọng dê tàm Pơrjum dờng cau ala măt gùt lơgar Đoàn Ơruh pơnu Kộng sản Hồ Chí Minh dơ̆ XII, lŏ H’ Hương Buôn Krông, Ƀí thư Thàñ đoàn ƀòn dờng Buôn Ma Thuột, càr Dăk Lăk ai jơnau bơto hơ̆ lơh gơs bơta pràn nàng lơh ngan bơsram tàp is să tờm. Is ồn là lam lài tàm broă geh sùm geh nùs nhơm kăc màng; lam lài tàm broă bơsram sră, bơsram tàp, tàm lơh broă sa, bơceh lơh; lam lài tàm broă lơh jăt kơnòl cíñ trị. Lŏ H’ Hương Buôn Krông pà git: “Hơ̆ là bơta pràn nàng añ pơn jăt tai bơsram mờ đòm jăt ơnà jăk, bồ tơngoh niam, broă lơh Hồ Chí Minh bal mờ să tờm wa Tổng Ƀí thư dê. Bơsram mờ wa jơnau ờ pơnhừ să, jăk chài, bơsram tàp nùs nhơm kờñ geh, tềm pềr, tơriang, lơh tờm, lơh broă ờ kơlôi bơta lơi. Pơn jăt tai geh sùm bơta niam kis, ờ ngòt kal ke, ờ ngòt glar bòl mờ lơh ngan nàng bơ̆t bơtàu nùs nhơm cíñ trị kơ̆ kơl jăp, geh nùs nhơm àng, bồ tơngoh ngăc ngar, jơnau kơ̆p kờñ dờng”.