VOV4.K’ho-Mờ bơta lơh ngan jơh nùs ờ lời làng bol lơi ờ geh sa tềp, ală kâp gơnoar ătbồ, mpồl lơh broă mờ mpồl cau bơh càr Kon Tum dê bơh lài mờ dơ̆ sa tềp mờr dùl nhai neh lam lòt sền, cih mat loh làng ală hìu bơnhă geh rài kis kal ke kờñ geh dong kờl wă rò sơnam pa sa tềp. Sa Tềp bơhiàn dà lơgar Ñâm Zần nam do, bulah kòp Kovid-19 tàm càr Kon Tum gam gơbàn kal ke, mơya mờ nùs nhơm gơdờp bal tàm bơta bè ờs pa, 10 kơnhoàl mờ ƀòn dờng bơh càr dê kung gam bơyai lơh sơl Ngai chờ kơnâm mbar tơlir mờ bơyai lơh bàr pe broă lơh lơh gơlik nùs nhơm chờ hờp chờ hờñ wă rò sơnam pa. Đơs bè bơta sền gròi kơlôi rơcăng bơh gơnoar ătbồ tiah do dê ai làng bol in wă rò sơnam pa sa tềp, ồng A Síp là Phó Củ tịc duh broă sùm Hội đồng Ñân zân xã Đăk Ruồng, kơnhoàl Kon Rẫy, pà gĭt: Lài mờ dơ̆ sa tềp, Duh broă sùm Hội đồng Ñân zân, Ủy ƀan Ñân zân xã, ală ƀan gah sơnah lơh broă, mpồl cau neh lơh broă lơh kờp sền wơl ală hìu bơnhă ờ geh phe sa, kal ke nàng yal mờ Đảng ủy, Hội đồng in kung bè Mặt trận dà lơgar Việt Nam xã nàng geh broă dong kờl phe sa di tŭ, wil tơl ai ală hìu bơnhă rƀah, hìu kal ke in, nàng jơh tơl nă làng bol tàm xã Đăk Ruồng cau lơi kung geh chờ hờp chờ hờñ lơm wă rò sơnam pa sa tềp Ñâm Zần 2022. Tŭ do, làng bol tàm xã Đăk Ruồng uă hìu bơnhă neh rơcăng ală phan sa bơkah pơnrơ is bơh yau, tơl hìu bơnhă ndrờm bơyai lơh wă rò sơnam pa sa tềp chờ hờp, tềm pềr mờ lơngai lơngò ngan, gơnoar ătbồ xã ờ lời hìu bơnhă lơi jơgloh tàm ală ngai sa tềp.

 Xã Đăk N’Drung, kơnhoàl Dăk Song, càr Dăk Nông geh 4 ƀòn jơi bơtiàn kòn cau dùl êt nă cau (mìng là cau M’Nông lơm) ndrờm geh lơh oh mi mờ ală anih lơh broă, mpồl cau bơh càr tus kơnhoàl. Tàm nam do òr, tŭ kòp Kovid-19 lơh bơtờp, ală anih lơh oh mi bal ndrờm lòt còp, pà phan, pơndờm pơnđiang làng bol sơrlèt gan kal ke. Tàm hơ̆, Viện Kiểm sát ñân zân càr Dăk Nông neh bơyai lơh pà 100 bơnah phan (kờp jơh priă là rlau 30 tơlak đong) ai làng bol tàm ƀòn Bu Boong in. Ồng Điểu Minh, Củ tịc Ủy ƀan Mặt trận dà lơgar Việt Nam xã Dăk N’drung, kơnhoàl Dăk Song pà gĭt, di dơ̆ wă rò sơnam pa sa tềp bơhiàn dà lơgar Ñâm Zần, ală anih lơh oh mi bal pơn jăt tai lòt còp làng bol: Sa tềp tus, xã Dăk N’drung den chờ hờp ngan rlau jơh là geh anih lơh oh mi bal bơh càr, kơnhoàl dê tus còp. Tơl anih tus tơn tàm ƀòn, pơgồp priă jền blơi sur pà làng bol in. Dơ̆ bàr tai là ală anih lơh oh mi bal lòt còp ală kra ƀòn, kwang ƀòn, cau ătbồ ƀòn mờ lòt còp gơnoar ătbồ ƀòn lơgar. Bơh hơ̆ gam mblàng yal, bơto pơlam làng bol in broă lơh broă sa, bơtàu tơnguh lơh sa. Kwơmàng ngan rlau jơh là rơcăng sơndră kòp Kovid-19, làng bol ờ gŏ lòt rê uă, tìp măt mờ cau krơi.

            Ai tàm xã tiah sar lơgar ngài Kông Lơng Khơng, kơnhoàl Kbang, càr Gia Lai dê, nùs nhơm rơcăng wă rò sơnam pa sa tềp bơhiàn dà lơgar dê Ñâm Zần kung neh duh hồl chờ hờp chờ hờñ sơl. Đoàn ơruh pơnu là mpồl cau tờm tàm broă lơh pơs wàs lơh sàng goh jơh ù tiah lài mờ tŭ wă rò sơnam pa. Tiah do geh ù tiah ƀòn lơgar chi che tơlir niam, sàng goh mờ niam bơnĕ, kơnờm bơh làng bol ƀòn lơgar neh jơh nùs tus bal ală dơ̆ hòi jà, srơh tàm pơrlòng bơ̆t bơtàu ƀòn lơgar pa. Bi Đinh Văn Lộc, Bí thư Đoàn xã Kông Lơng Khơng, pà gĭt: tơngai do, Đoàn xã neh pơgồp bal mờ ală hìu bơnhă làng bol lam sờr ntrờn rlau 20 wàng ròng rơpu kơnrồ ơm ngài mờ hìu ơm. Tờ 5 nơm bơtô sồ siă tiah 20 nơm hìu um, hìu jă brê tơl sàng goh. Rơcăng wă rò sơnam pa sa tềp bơhiàn Ñâm Zần, Đoàn xã neh hòi jà rlau 20 nă đoàn viên ơruh pơnu pơs wàs lơh sàng goh jơh 5 kơi sồ gùng lòt làm xã, tam pa uă tờm chi nàng ù tiah ƀòn lơgar tơlir niam sàng goh. Bi Đinh Văn Lộc, đơs: Mờ gơnoar broă là Ƀí thư đoàn xã, bol añ pơn jăt tai sồr ci đoàn thôn ƀòn mblàng yal hòi jà đoàn viên ci đoàn lơh jăt niam bơkah niam sươn rơhàng, pơs wàs sàng goh jơh ală gùng ƀòn, jơng gùng tung rềng, hìu đam pal pơs wàs sàng goh jơh. Kơ̆p kờñ sa tềp nam do jơh ală đoàn viên ci đoàn ală thôn ƀòn tam klăc chờ hờp bal, ờ lơh tìs ală jơnau cih bơh kơrnoăt boh lam dê. Bol he kung neh gŏ, kòp Kovid-19 gơbàn kal ke ngan, bol añ neh, gam mờ pơn jăt tai hòi jà đoàn viên ơruh pơnu lơh jăt niam rơcăng sơndră kòp Kovid-19, ngan là tàm dơ̆ sa tềp, nàng pơgồp bơnah tơl nă cau, tơl hìu bơnhă sa tềp chờ hờp, să jan pràn kơldang mờ lơh sa sơlơ bơtàu tơnguh tai.

Tàm xã Dà Sar, kơnhoàl Lạc Dương, càr Lâm Đồng bulah geh gơrềng bơh kòp Kovid-19, mơya tài bơh kơphê gơguh giă den tàng rài kis lơh sa bơh làng bol jơi bơtiàn kòn cau dùl êt nă cau dê tàm xã ndrờm kơ̆ kơl jăp mờ bơtàu tơnguh ngan. Mờ bơta tàm sơm băt tê bal, tam klăc bal bơh làng bol dê, broă lam lơh jăt jơnau kờñ dơ̆ lĕ bal bơtàu tơnguh lơh sa mờ rơcăng sơndră kòp tàm bơta bè ờs pa do neh lơh geh cồng nha uă ngan, làng bol chờ hờp chờ hờñ ngan wă rò sơnam pa. Ồng Liêng Jrang Ha Rô Ky, Củ tịc Ủy ƀan Ñân zân xã Dà Sar, pà gĭt: Kàl lơh sa nam 2020- 2021, tài gơrềng bơh kòp Kovid-19 dê, bal mờ jơh gùt lơgar, xã Dà Sar kung gơrềng uă ngan sơl, bulah bè hơ̆, làng bol kung gam sơngka sền gàr kơphê hòn kis dờng niam bè ờs sơl. Nam lài, kơphê lơh geh bulah kung gơmù sơl, bơsir wơl giă kơphê nam do gơguh uă dơ̆ pơndrờm mờ lài den tàng rài kis làng bol dê pơn jăt kơ̆ kơl jăp, lơh sa- mpồl bơtiàn xã dê pơn jăt tai bơtàu tơnguh, làng bol chờ hờp chờ hờñ ngan. Bal mờ ală broă lơh lơh jăt jơnau kờñ dơ̆ lĕ bal bơtàu tơnguh lơh sa mơkung rơcăng sơndră kòp Kovid-19 geh cồng nha bơh kâp hơđang dê sồr, den bơta gĭt wă bơh làng bol dê bè kơnòl bal mờ mpồl bơtiàn geh gơguh tai, ngan ngồn broă lơh jăt bơtàu tơnguh lơh sa bal mờ rơcăng sơndră kòp geh cèng wơl cồng nha niam, geh lơh geh ală jơnau kờñ neh ai tơlik. Bơh kàl lơh kơphê geh giă den broă tam ngai bồ sơnam pa do nùs nhơm làng bol dê ndrờm chờ hờp ngan.

Ndrờm bè hơ̆ sơl, làng bol ală jơi bơtiàn tàm kơnhoàl Dăk Mil, càr Dăk Nông nam do wă rò sơnam pa sa tềp chờ hờp ngan tài bơh phan lơh geh bơh sươn sre “geh tơnhàu uă mờ tăc geh giă tai”. Tàm ƀòn Bu Dăk, xã Thuận An là tiah geh rlau 315 hìu bơnhă bal mờ pơgăp 1 rbô 200 nă làng bol, jơh ală là cau M’nông lơm. Priă lơh geh tờm bơh làng bol dê mìng kơnờm jơh lơm tàm broă lơh kơphê mờ lơh kòi sre. Ồng Y Bling Jing, Bí thư Ci ƀộ ƀòn Bu Dăk pà gĭt, nam do, kơphê lơh geh uă mờ tăc geh giă tai, bơtơ̆t dơng dà Bu Dăk lài do geh lơh niam wơl den tàng geh tơl tuh ai gĭt nđờ jơ̆t lồ kòi sre 2 kàl, rài kis làng bol kung geh bơtàu tơnguh tai. Ồng Y Bling Jing, đơs: Sơnam yau neh lô̆c, sơnam pa neh tus, làng bol kung chờ hờp ngan bơtàu tơnguh lơh sa. Bulah gam kal ke, mơya làng bol kung gam lơh ngan bơsong sơl. Bal mờ hơ̆ geh bơta dong kờl bơh Đảng, Dà lơgar mờ gơnoar ătbồ tiah do dê, bol añ sền gròi tus làng bol. Bol añ mblàng yal sền gàr pràn kơldang să jan, tàm hơ̆ geh broă lơh jăt jơnau sồr 5K nàng sền gàr niam ờdo ờdă. Tàm dơ̆ sa tềp kung bè hơ̆ sơl, nàng sền gàr pràn kơldang să jan ai he in mờ ai ƀòn lơgar in, làng bol dùl nùs bal tàm sơm băt tê bal rơcăng sơndră kòp bơtờp.

Cau mblàng Lơ Mu K’Yến