VOV4.K’ho- Tàm 04 ngai ơm rlô Dơ̆ lơh chờ Sơntờm Dà lơgar ngai 02/09, ƀòn dờng Dà Làc, càr Lâm Đồng mìng wă geh 85 rbô nă năc. Jơh ală broă lơh drơng broă nhơl chờ ndrờm geh lơh niam lơm. Tàm khà 85 rbô nă năc lòt nhơl tus Dà Làc, càr Lâm Đồng lòt còp, ơm rlô pràn să tàm Dơ̆ lơh chờ do geh 1 rbô 500 nă năc dunia, 13 rbô 500 nă năc tàm lơgar, tàm hơ̆ geh 60 rbô nă năc lòt nhơl ơm bĭc wơl mang. Tài bơh năc lòt nhơl ơm bĭc wơl mang dùl êt den tàng ală hìu năc mìng rơ̆p ngui geh kờp bal 65% bơta pràn cơlcŭ ơm rlô bĭc.

Năc lòt nhơl ờ gơguh nisơna den tàng tiah tờm Dà Làc ờ rơđàih ngan, ờ hăt hal ir cau tàm trồ mang bè ală tơngai lài

Tàm jơh gùt tŭ tơngai ơm rlô dơ̆ lơh chờ, Dà Làc, Lâm Đồng ờ gơlik geh jơnau kòl gùng, kòl rơndeh jŏ jòng tàm tiah tờm ƀòn dờng dê. Jơh ală broă lơh nhơl chờ bè drơng broă ñô sa, lơh rài bồ tơngoh, tiah lòt còp lòt nhơl kung ndrờm geh lơh bè ờs, ờ hăt hal ir cau bè ală tơngai lài. Jăt Sở Văn hoá, Thể thao mờ Zu lịc càr Lâm Đồng dê yal, bơh tài khà năc lòt nhơl tus Dà Làc, càr Lâm Đồng ờ gơguh uă nisơna tàm dơ̆ ơm rlô dơ̆ lơh chờ là tài bơh năc lòt nhơl lòt rah rài sùm tàm ală ngai lồi poh. Mùl màl, 8 nhai bồ nam do, kờp jơh năc lòt nhơl tus Dà Làc, càr Lâm Đồng neh geh rlau 5 tơlak nă, gơguh 153% pơndrờm bal dùl tŭ mờ nam lài.

Cau mblàng Lơ Mu K’Yến