Nam 2022, kờp jơh broă rơndăp lơh priă bơcri dà lơgar bơh càr Lâm Đồng dê geh tam pà là mờr 6 rbô 500 tơmàn đong nàng lơh 350 rơndăp broă lơh. Tàm hơ̆, geh 722 tơmàn đong là priă bơcri gơ dŏ jòng bơh nam 2021. Jăt ồng Bùi Sơn Điền, Kwang ătbồ Sở Kế hoạc mờ Đầu tư càr Lâm Đồng yal, kờp tus ngai 15/11 pa do, broă rơndăp lơh priă bơcri dà lơgar nam 2022 bơh càr Lâm Đồng dê mìng rơ̆p pa ai geh 3 rbô 694 tơmàn đong, geh 68,5% broă rơndăp lơh. Bơh tài broă ai priă bơcri lơyài tài bơh tìp kal ke, gơkòl tàm broă sờr ntrờn ai ù mờ ală sră pơ àr dà lơgar dê.

Tŭ do, Sở Kế hoạc mờ Đầu tư gam jơh nùs pơgồp bal mờ ală anih lơh broă geh gơnoar bơh càr dê sồr ngan ală cau tờm bơcri priă lơh mhar tơngai lơh. Lơh ngan tus ngai 31 nhai 12 nam do lơh geh khà ai priă bơcri rlau 95% mờ tus jơh qúy dùl nam 2023 geh 100% broă rơndăp lơh. Ồng Bùi Sơn Điền, đơs: Bol añ kung neh lơh broă sơl mờ tơl cau tờm bơcri priă, mờ ală tiah pal đơs là tìp uă ngan kal ke. Mơya, jăt jơnau yal lài mờ jăt jơnau hơ bơh ală cau tờm bơcri priă dê den jơh ală là rơ̆p ai priă jăt di tơngai. Bơnah priă bơcri gam wơl uă ngan tàm tŭ tŭ tơngai lơh mìng gam rlau 1 nhai tai lơm gời, den tàng bè hơ̆ bol añ kung neh lơh broă, hòi điện sồr ngan, tơngkah ngan. Mìng is bàr pe rơndăp broă lơh digơlan gơtìp ờ lơh jăt di tơngai den kung neh geh sră yal mờ Ủy ƀan Ñân zân càr in sơl.

Pal sền ngăc là ală rơndăp broă geh priă bơcri ai priă lơyài ndrờm gơ ơm tàm ală broă bơ̆t bơtàu bơh ală sở, ngàñ bơh càr dê lơh cau tờm bơcri priă. Mùl màl, Sở Thông tin mờ Truyền thông geh tam pà 22 tơmàn đong mơya rơ̆p mìng pa ai priă geh 28% lơm, Sở Nông nghiệp mờ Phát triển Nông thôn càr geh tam pà 224 tơmàn đong pa lơh ai priă geh 23% lơm, Hìu sơnơm dờng càr geh tam pà 12 tơmàn đong mơya kung rơ̆p mìng pa ai priă geh 11% lơm...

Tềng đăp jơnau priă bơcri dà lơgar dê tàm ù tiah càr dê ai priă lơyài ir, ồng Trần Văn Hiệp, Củ tịc Ủy ƀan Ñân zân càr Lâm Đồng pà gĭt, geh kràñ cê kơ̆ nùs bơsong kơnòl gơwèt mờ ală cau tờm bơcri priă dilah ờ lơh geh jơnau sồr ai priă bơcri jăt di broă rơndăp lơh. Ồng Trần Văn Hiệp, đơs: Ai priă bơcri dà lơgar bơh càr dê gam uă ngan bơta kwi kwơ, lơyài tàm broă tơm priă sờr ntrờn ai ù, bàr pe broă bơ̆t bơtàu dilah di là neh pal lơh gơ dê mơya tŭ do kung gam ờ hềt lơh geh sơl. Tàm hơ̆, broă ai priă bơh bàr pe ngàñ dê den gam gơkòl uă ngan, pal ai jơnau bơsram mờng chài mờ ờ gŏ di lời gơbàn tai. Nùs nhơm là đơs ngan tus lồi nam, anih lơi ờ ai priă geh den sồr ai wơl priă bơcri mờ ờ pà wơl tai, pal kong broă bơ̆t bơtàu ờ hềt gơs. Mờ kơnòl gơwèt mờ Củ tịc mờ Kwang ătbồ ală sở, ngàñ.