VOV4.K’ho - Tơngai do, broă mus kơl chi brê, sơgràm ù gơtìp kal ke ngan tàm uă tiah tàm Tây Nguyên. Uă bă ù gơtìp mus kơl sơgràm là bơnayh ù bal mờ brê neh geh jào ai ală mpồl lơh sa kă bro in lơh jăt rơndăp broă bơcri priă. Nàng lơh niam wơl, càr Lâm Đồng mờ càr Dăk Nông gam đơng lam ală anih lơh broă geh gơnoar, lơh jăt uă broă lơh nàng tơnguh uă cồng nha broă atbồ, sền gàr brê. Mờ lơh pràn tàm broă tă sờr ală broă lơh sơgràm ù brê.

Bơh nam 2018 tus tŭ do, anih lơh broă geh gơnoar càr Lâm Đồng gŏ mờ lơh sră lơh glài rơlao 1 rơbô dơ̆ mùs kơl chi brê, mờ kờp jơh bă brê gơtìp aniai rơlao 223 lồ. Mìng is nggùl bồ nam 2022, geh 80 dơ̆, bă brê gơtìp aniai gơguh mờr 30% pơn drờm mờ tŭ do nam 2021.

                      Càr Lâm Đồng lơh ngan lơh glài cau geh kơnòl lời gơtìp mus kơl chi brê

Jăt ồng Nguyễn Văn Sơn, Kwang atbồ Sở NN mờ PTNT càr Lâm Đồng yal, geh uă brê gơtìp roh tàm bă ù neh geh jào ală mpồl lơh sa kă bro in, mơya ờ lơh jăt rơndăp broă, ha là geh lơh mơya lơyài, ờ ai mpồl cau atbồ sền gàr. Càr neh lơh ngan toh wơl 208 rơndăp broă lơh bơh ală mpồl lơh sa kă bro mờ kờp jơh uă brê rơlao 30 rơbô lồ. Mờ kơlôi sơnơng, ngui kông nghệ pa tàm broă atbồ, tơnguh cồng nha broă atbồ, sền gàr brê bơh ală mpồl lơh sa kă bro tàm càr dê. “Bă brê geh rơndăp broă lơh tus git nđờ rơhiang lồ, măt bè ờs ờ gơtùi was den tàng pal kờp, kờp sền den roh priă mờ priă den cau lơi dờp kơnòl? Pal mờ broă lơh kỹ thuật nàng ai git nam do geh nđờ dơ̆ tìs gơtìp, jăt broă sền gròi bè lơi, roh nđờ brê den hơ̆ sồng sồr cau tơm, pal lơh glài mờ priă. Bol añ gam lơh broă mờ VNPT nàng lơh phần mềm sền gròi brê bơh ală mpồl lơh sa kă bro do. Gam brê tàm ală mpồl atbồ brê den geh kơnòl bơh cau tờm brê neh loh bloh”.

               Ală mpồl lơh broă geh gơnoar dus sơbì jơh ală phan tam ờ di mờ adăt boh lam tàm bă ù brê

Càr Lâm Đồng tŭ do geh rơlao 533 rơbô lồ brê. Bơdìh mờ bă brê geh jào ai ală mpồl lơh sa kă bro in ơpah nàng lơh rơndăp broă bơcri priă, brê bơh càr Lâm Đồng gam geh jào ai 27 mpồl cau tờm brê Dà lơgar in. Lời gơtìp mus brê, kơl chi brê ờ di mờ adăt boh lam, 374 nă kwang bàng, kông cư̆k, viên cứk neh gơtìp lơh glài. Ồng Ngô Văn Ninh, Kwang atbồ Cơ dŭ lơh broă lơh, cau sơ pơ̆ bơr UɃÑZ càr Lâm Đồng pà git, càr gam ngui ndrờm bal uă broă lơh pràn kơl dang nàng atbồ sền gàr brê. Ồng Ngô Văn Ninh đơs: “Bơta tìs mờ adăt sền gàr brê gơtìp kal ke ngan. Bŭ lah càr neh geh uă sră nggal đơng lam, mơya broă kơrian, tơmù uă ờ hềt geh di mờ jơnau kờñ. Tàm tơngai tus, càr lơh jăt nền nòn broă atbồ sền gàr brê. Dơ̆ do lơh ngan lơh glài di tŭ ală mpồl lơh broă, cau dùl nă să lời gơtìp tìs tàm gùt càr. Bal mờ hơ̆ là chồl pràn broă tam 50 tơlăk tờm chi brê, mìng is nam do tam 6 tơlăk 600 rơbô tờm. Đơs ngan broă atbồ, sền gàr bơh càr đơng lam pràn ngan”.

Tàm càr Dăk Nông, ală mpồl lơh broă geh gơnoar neh bơyai lơh tă sờr gơwèt mờ ală cau sơgràm ờ di mờ adăt boh lam rơlao 35 lồ brê jăt gah gùng 28 gơl lòt gan xã Quảng Sơn, kơnhoàl Dăk Glong.

Tàm nhai 6 nam 2022, jơh ală broă lơh hìu bal mờ phan tam ờ di mờ adăt boh lam tàm bă ù rơlao 35 lồ geh gơtìp tă sờr nàng tam wơl brê

Tiah gơtìp tă sờr, toh wơl ù là bă ù gơtìp sơgràm jăt gah gùng 28 gơwèt Kông ty TNHH MTV lâm nghiệp Quảng Sơn atbồ. Do geh sền là tiah gơtìp uă ngan bè broă mùs kơl chi brê, sơgràm ù brê tàm càr Dăk Nông tŭ do. Ală mpồl lơh broă geh gơnoar neh git 133 nă cau lơh ală broă, tam phan tam ờ di mờ adăt boh lam tàm bă ù brê mờ kờp jơh geh 35,41 lồ.

Tàm tiah do, bồ nhai 3 nam 2022, kơnhoàl Dăk Glong neh lơh jăt broă rồn bơrklơn gơwèt mờ 13 nă cau, toh wơl geh 3 lồ 4 sào ù brê. Kờp dŭ bơh ngai 07 tus lồi nhai 6 nam 2022, càr geh bơyai lơh rồn bơklơn nàng toh jơh bă ù bơh ală cau gam tai, toh jơh rơlao 35 lồ ù nàng tam wơl brê. Ồng Lê Đình Tuấn, Phó Củ tịc UɃÑZ xã Quảng Sơn pà git, broă rồn bơklơn geh lơh di mờ kơrnoăt tàm adăt boh lam. Gơnoar atbồ xã neh lơh gơs sră nggal, yal ală cau tìs in; bơyai lơh cri bơyai mờ sùm lam sồr làng bol tă sờr is, ntrờn broă lơh neh gơtìp tìs. “Khà bă 35 lồ brê lơh jăt broă rồn bơklơn dơ̆ do kung kal ke ngan. Mơya do là broă lơh geh uă nàng xã pơn jăt tai bơsong gơwèt mờ bă brê mờ ù brê gam gơtìp làng bol gơgràm, bơdìh mờ 35 lồ do, den bol añ geh pơn jăt tai rồn bơklơn, tă sờr ală broă lơh neh gơtìp tìs, mờ lơh jăt kơrnoăt sồ 2159 bơh UɃÑZ càr dê bè broă tơmù ală broă lơh gam ờ pràn gơrềng tus mờ broă sền gàr brê mờ ù brê”.

Ală bă ù tơnơ̆ mờ tŭ neh rồn bơklơn sờr tă, geh jào Kông ty TNHH MTV Lâm nghiệp Quảng Sơn atbồ, tam wơl brê. Jăt ồng Đinh Văn Nam, Củ tịc Kông ty do yal, Kông ty neh lơh gùng dà nàng tam wơl brê tàm kàl mìu nam do tơn. “Tài ù tàm tiah do geh khà priă den tàng broă tam wơl brê he git là kal ke, mơya kông ty geh lơh ngan tơrgùm ală bơta pràn nàng lơh jăt broă sền gàr mờ tam wơl brê. Broă sơgràm wơl tơnơ̆ do di gơlan geh mơya bơta kwơ màng là geh broă pơgồp ndrờm bal bơh ală anih lơh broă geh gơnoar, tàm hơ̆ uă ngan là UɃÑZ xã Quảng Sơn lơh jăt ală broă kơrian mơ tơn bơh sơnrờp nàng lơh jăt broă tam wơl chi tàm bă ù brê do”.

Cau mblàng Ndong Brawl