VOV4.K’ho- Tềng đap bơta khà cau bơtờp kòp Kovid-19 tàm càr gơguh uă, ngai 24/02, Ủy ƀan Ñân zân càr Lâm Đồng geh sră nggal đơng lam ală mpồl lơh broă geh gơnoar, Ủy ƀan Ñân zân ală kơnhoàl, ƀòn dờng tàm càr sơlơ lam lơh jơh nùs ală broă lơh rơcang sơndră kòp. Tàm nggùl nhai do, khà cau bơtờp kòp Kovid-19 pa tàm càr Lâm Đồng gơguh uă nisơna rlau 285% mờ rlau 12 rbô nă cau bơtờp kòp, tơnguh khà cau bơtờp kòp tàm càr tus rlau 25 rbô 700 nă. Pal đơs là tàm khà ală cau bơtờp kòp Kovid-19 pa, uă ngan là kơnòm bơsram mờ cau pơgru. Mìng kờp is bơh ngai 07/02 tus tŭ do, khà kờp tơrgùm ờ hềt tơl neh ai gŏ, geh rlau 1 rbô 700 nă kơnòm bơsram mờ git nđờ rhiăng nă cau pơgru geh git gŏ bơtờp kòp Kovid-19.

Ủy ƀan Ñân zân càr Lâm Đồng sồr Sở Giáo zụk mờ Đào tạo càr Lâm Đồng sùm lòt sền, gròi sền broă lam lơh broă lơh rơcang sơndră kòp tàm ală hìu bơsram tàm càr; lơh glài kràñ ală cau ờ lơh jat ală broă lơh rơcang sơndră kòp Kovid-19 jat jơnau sồr. Ủy ƀan Ñân zân càr Lâm Đồng kung sồr Sở Y tế Lâm Đồng lam lơh broă cit sơnơm vaccine kòp Kovid-19 sơbac mhar rlau tai, kuơmàng mhar lam lơh cit sơnơm vaccine ding dơ̆ 1 mờ ding dơ̆ 2 ai cau bơh 12 sơnam rlau hơđăng in mờ cit ding tơngkah wơl, ding bơ tơl ai cau bơh 18 sơnam rlau hơđăng in, kờp bal mờ ală cau ntrờn ơm kis bơh tiah ndai tus. Gàr niam tàm nhai 2 do, 100% cau bơh 12 sơnam rlau hơđăng ndrờm geh cit tơl ding sơnơm vaccine kuơmàng.

Cau mblàng K’Duẩn