250 nă cau ala măt neh ala măt ai rlau 378 rbô nă làng bol jơi bơtiàn dồ êt nă cau tàm càr in tus bal pơrjum, tàm hơ̆ geh uă cau pơnrơ gơguh jak tàm srơh sơnđờm mŭt lơh broă, bơtàu tơngguh lơh sa, brồ guh lơh pas. Pơrjum dờng geh jơnau kờñ pơnđơl tus nam 2030, priă lơh geh kờp bal tiah jơi bơtiàn dồ êt nă cau dê geh bơh 84 tus 87 tơlak đong dồ nă dồ nam; mờ khà hìu rƀah gơmù bơh 2 tus 3% dồ nam…Lơh gơrề pràn kơldang ală srơh sơnđờm mŭt lơh broă, tàm pơrlòng lơh sa; sền gròi bơcri priă bè ală bơta nàng bơtàu tơngguh jơh bal bè lơh sa hìu bơnhă, mpồl lơh sa kă bro, mpồl lơh broă bal tàm ală ƀòn lơgar tàm càr.

Pơrjum dờng đơs nền, rài kis làng bol ală jơi bơtiàn dồ êt nă cau bơh càr Lâm Đồng dê neh geh tơnguh tơl làm. Broă gĭt mờ ngui di tŭ ală gơguh jak măy mŏk dê tàm broă lơh sa neh dong priă lơh geh kờp bal geh 50 tơlak đong dồ nă dồ nam, gơguh 12,5% pơndrờm mờ nam 2019; Is ồn, tŭ do jơh gùt càr geh 353 mpồl lơh sa kă bro bơh làng bol jơi bơtiàn dồ êt nă cau dê lơh tờm, mờ kờp jơh priă cih tàm sră pơ àr gơguh tus 2 rbô 773 tơmàn đong.

Đơs tàm pơrjum dờng, ồng Y Vinh Tơr, Phó Kwang ătbồ Anih duh broă Jơi bơtiàn cih dờp, broă lơh bơtàu tơngguh lơh sa- mpồl bơtiàn tiah làng bol jơi bơtiàn dồ êt nă cau bơh càr Lâm Đồng dê lơh geh cồng nha tơl làm ngan. Nàng pơn jăt tai đòm jăt ală cồng nha neh lơh geh, ồng Y Vinh Tơr đơs là, Lâm Đồng pal pơn jăt tai sền gròi lơh li la ală priă ai tiah làng bol jơi bơtiàn dồ êt nă cau in, lơh pràn ală broă lơh jơnau kờñ dà lơgar bè bơ̆t bơtàu ƀòn lơgar pa mờ tơrmù rƀah kơ̆ kơl jăp.