Tơngai pa do, pah tŭ geh dơ̆ lam lơh pơyoa priă tềm pềr sơm bat tê bal tài cau rƀah den mò Nguyễn Thị Xuân An, ơm tàm sơnah ƀòn 3, ƀòn dờng Dà Làc, càr Lâm Đồng ndrờm lơh jat mờ tus bal. Gơwèt mờ mò, bulah khà priă he pơyoa ờ uă mơya geh kwơ ngan, sơm bat tê bal bal mờ jơh gùt mpồl bơtiàn wèt tus mờ cau rƀah, cau kal ke, dong khi in geh priă càn nàng bơcri priă bơtàu tơnguh lơh sa hìu bơnhă. Mò Nguyễn Thị Xuân An, đơs:“Să tờm añ pah nam ndrờm tus bal lơm. Pơn yơu bè nam lài añ pơyoa dồ ết den nam do pơnđơl pràn lơh ngan pơyoa uă rlau tai, bè hơ̆ sùm gơ dê. Nam do pơyoa priă tềm pềr geh 20 tơlak đong, kờp dŭ ngai 14/03 do lòt tàm sơnah ƀòn nàng pơyoa tai”.

Do là nam dơ̆ 4 Ngân hàng Cíñ sac Xã hội càr Lâm Đồng pơgồp bal mờ Ủy ƀan Mặt trận Dà lơgar Việt Nam mờ ală mpồl cau bơh càr dê bơyai lơh dơ̆ lam lơh pơyoa priă tềm pềr sơm bat tê bal tài cau rƀah. Jat hơ̆, khà cau lơh jat, tus bal pơyoa priă tềm pềr bơh broă lơh do ngai sơlơ uă, khà priă dờp geh kung ngai sơlơ gơguh sơl. Bơh 24 tơmàn đong dờp geh tơnơ̆ dơ̆ lam lơh bơh sơnrờp, tus dơ̆ 3 den khà priă gơguh tus 130 tơmàn đong priă pơyoa tềm pềr sơm bal tê bal tài cau rƀah.

Jat ồng Nguyễn Hữu Quang, Phó Kwang atbồ Ngân hàng Cíñ sác Xã hội càr Lâm Đồng yal, broă lơh pơyoa priă tềm pềr sơm bat tê bal tài cau rƀah neh geh bơta gơrề uă dờng ngan tàm ală rơnàng làng bol tàm ù tiah do dê. Dơ̆ 4 do, broă lơh pơyoa priă tềm pềr sơm bat tê bal tài cau rƀah rơ̆p jŏ jòng dùl nhai, kơ̆p kờñ gơ hòi gơ jà tai uă cau tus bal mờ lơh jat bal. Ồng Nguyễn Hữu Quang, đơs:“Nam do, pơyoa priă tềm pềr sơm bat tê bal tài cau rƀah jŏ jòng tus 1 nhai. Bol añ kung kơ̆p kờñ broă lơh geh tŭ tơngai jŏ jòng rlau rơ̆p nàng kờñ làng bol tus bal tơl làm, uă rlau tai. Bol añ bơdìh mờ broă lam lơh tàm Anih lơh broă tơn, den ală ngai lơh broă bơh ală tiah lơh broă kơ̆ kơl jăp tàm ală xã, sơnah ƀòn, thị trấn rơ̆p pơn jat tai lam lơh broă hòi jà nàng làng bol, mpồl lơh sa kă bro tàm tiah do in tus bal tơn tă pơgồp bal tàm broă lơh”.

Tus tơngai tŭ do, tơnơ̆ rlau 1 poh lam lơh, broă lơh pơyoa priă tềm pềr sơm bat tê bal tài cau rƀah tàm càr Lâm Đồng neh gơ hòi gơ jà rlau 1 rơbô 400 nă đảng viên, kwang bàng, kông cứk, viên cứk, cau tàm mpồl, đoàn viên, cau lơh broă mờ làng bol tus bal lơh mờr 1 rơbô 600 sră tềm pềr, mờ khà priă gơguh tus rlau 67 tơmàn đong.

Ồng Võ Ngọc Hiệp – Kwang bàng Mpồl lơh kơnòl broă sùm Tỉñ ủy càr, Phó Củ tịc Ủy ƀan Ñân zân càr Lâm Đồng, Kwang atbồ Mpồl ala mat Hội đồng Quản trị Ngân hàng Cín sác Xã hội càr Lâm Đồng, đơs: “ Broă bơyai lơh “Nhai pơyoa priă tềm pềr sơm bat tê bal tài cau rƀah” geh gơtha kwơ màng uă ngan, nàng kờñ lơh geh ală priă jền lơh geh ngai sơlơ niam rlau tai jơnau kờñ càn priă bơh cau rƀah mờ ală cau tàm mpồl dong kờl ndai in, pơgồp bơnah lơh jat jơnau kờñ tơrmù rƀah kơ̆ kơl jăp bơh càr dê. Mơkung bơh hơ̆ lơh geh bơta tam gơl bè bơta gĭt wă mờ broă lơh bơh ală kấp, ală ngàñ mờ jơh gùt mpồl bơtiàn dê tàm broă lơh geh ală priă jền ai càn priă cíñ sác Xã hội; hòi jà ală mpồl lơh sa kă bro, anih lơh broă, mpồl lơh broă, kwang bàng, kông cứk, viên cứk, cau lơh broă mờ ală rơnàng làng bol tàm càr Lâm Đồng tơngŏ broă lơh niam bơnĕ, lơh jat niam nùs nhơm tàm dong tàm kờl bal gơwèt mờ cau rƀah mờ ală cau ờ pràn tàm mpồl bơtiàn mờ broă lơh pơyoa priă tềm pềr tàm Ngân hàng Cíñ sác Xã hội tơngŏ “Broă lơh dềt rơhìn mơya geh kwơ uă ngan” nàng lơh geh tai ală priă jền “Sơm bat tê bal tài cau rƀah mờ ală cau kờñ geh bơta dong kờl ndai”.

Tơrmù rƀah kơ̆ kơl jăp là gùng dà broă lơh dờng bơh Đảng, Dà lơgar mờ là broă lơh bơh jơh gùt làng bol dê, cèng nùs nhơm niam uă ngan, là nùs nhơm geh lơh jat sùm, ờ tŭ lơi tam gơl bơh Đảng, Dà lơgar dê tàm broă lơh bơt bơtàu rài lơh sa drà kă bro wèt tus Xã hội củ nghĩa. Càn priă dong kờl bơh Ngân hàng Cíñ sác Xã hội lơh là dùl tàm ală broă lơh dong tơrmù rƀah bơh Đảng, Dà lơgar dê lơh mờ tàm ù tiah càr Lâm Đồng broă lơh càn priă dong kờl neh lơh geh cồng nha dờng màng, pơgồp bơnah lơh tơrmù rƀah kơ̆ kơl jăp, bơt bơtàu ƀòn lơgar pa, gàr niam rài kis mpồl bơtiàn tàm tiah do dê.

Wèt tus srơh “Jơh gùt lơgar sơm bat tê bal tài cau rƀah- Ờ gŏ lời dồ nă cau lơi gơ tìp lời wơl bơh ngkời” bơh Thủ tướng Cíñ phủ dê lam lơh, tàm 3 nam do “pơyoa priă tềm pềr sơm bat tê bal tài cau rƀah” neh geh Ngân hàng Cíñ sác Xã hội càr Lâm Đồng pơgồp bal mờ 4 mpồl cíñ trị mpồl bơtiàn dờp gơnoar bơyai lơh geh cồng nha mờ bơta lơh jat bal bơh uă ngan cau tàm mpồl, đoàn viên mờ làng bol tàm càr pơgồp bơnah uă ngan tàm broă lơh geh ală priă jền bơtơl ai Ngân hàng Cíñ sác Xã hội in ai cau rƀah mờ ală cau kờñ geh dong kờl ndai in càn.