Nam 2022, lơh sa- mpồl bơtiàn càr Lâm Đồng dê pơn jat tai bơtàu tơnguh pràn, lơh geh uă cồng nha kwơ màng tàm jơh ală gah broă. Jơh 18 broă jàu ndrờm lơh geh mờ sơr lèt broă rơndap lơh geh ai. Tàm hơ̆, niam ngan rlau jơh là khà gơguh lơh sa lơh geh 12, 09%, sơr lèt uă pơn ndrờm mờ broă rơndap lơh geh ai là bơh 6 tus 7%; lơh sa suơn sre bơtàu tơnguh bè ờs, lơh sa mờ măi mok- drơng broă gơguh pràn, nhơl chờ bơtàu tơnguh wơl mhar; priă lơh geh bơh tăc phan mờ lơgar ndai gơguh uă ngan pơndrờm mờ broă rơndap lơh; tă dia kờp dŭ jơh gùt nam lơh geh 13 rơbô 100 tơmàn đong. Broă lơh tơrmù rƀah kơ̆ kơljap lơh geh uă cồng nha niam ngan, sền gàr niam rài kis mpồl bơtiàn geh gàr niam, sền gàr dà lơgar, sền gàr lơngap lơngai geh gàr kơ̆.

Đơs tàm dơ̆ sơnđờm mŭt pơrjum, ồng Trần Đức Quận, Ủy viên Ƀan cấp hàñ Đảng Dà lơgar, Ƀí thư Tỉñ ủy, Củ tịc Ủy ƀan Ñân zân càr Lâm Đồng đơs là, bulah lơh sa- mpồl bơtiàn lơh geh uă tềl tơngŏ niam ngan mơya kung gam geh uă bơta ờ hềt pràn, bơta ờ niam tàm broă lơh đơng lam, sồr lơh kờñ pal geh sền sơ wì, cribơyai, sơñio jơnau lơh gơbàn mờ gùng dà broă lơh bơsong. Tàm pơrjum dơ̆ do, ală kwang bàng geh tă pơgồp jơnau đơs gơwèt mờ 27 jơnau yal, sền sơ wì jơnau lơh nền ring bal 28 Nghị quyết kwơ màng, mờ pờ tê ring bal ală rơndap broă lơh, rơndap broă lơh cèng jơnau kwơ màng, geh gơrềng uă ngan tus bơta bơtàu tơnguh bơh càr dê, bè: rơndap broă lơh lơh gùng rơndeh ntoăt răt gơl gùng Bảo Lộc mờ Liêng Khàng jat broă lơh lơh broă bal gah dà lơgar mờ làng bol; rơndap broă lơh sơndră gơ kòl gùng lòt tàm ù tiah ƀòn dờng Dà Làc dê.