VOV4.K’ho- Mho ngai 25/5, tàm ƀòn dờng Dà Làc, Liên đoàn Lao động càr Lâm Đồng neh bơyai lơh pơrjum jờng rơ “Mpồl lơh sa kă bro tài cau lơh broă” geh pơn rơ nam 2022. Tŭ do càr Lâm Đồng geh 11 rbô 850 mpồl lơh sa kă bro, mờ kờp jơh priă bơcri lơh sa, kă bro geh 141 rbô tơmàn đông. Kơnờm sền gròi tus broă lơh niam broă bơcri priă, sền gròi bơsong, tă bơsong di tŭ ală kòl yan, kal ke mờ lam lơh ring bal ală broă lơh bè dong kờl bơtàu tơnguh mpồl lơh sa kă bro, ală mpồl lơh sa kă bro càr Lâm Đồng neh hời rơ hời tơnguh bơta pràn, bơta ƀuơn krơi is he dê, pơgồp bơnah kuơmàng tàm broă tam gơl rơndap tap sèng lơh sa, tam gơl broă gàr ờdo ờdă rài kis mpồl bơtiàn, tơnguh tă dia, chồl pràn bơtàu tơnguh lơh sa- mpồl bơtiàn bơh càr dê.

Tàm pơrjum, 30 mpồl lơh sa kă bro geh cồng nha jak ngan tàm broă lơh sa, kă bro, sền gròi cau lơh broă mờ mpồl bơtiàn in neh geh jờng rơ. Jat Liên đoàn Lao động càr Lâm Đồng đơs, broă jờng rơ di tŭ ală mpồl lơh sa kă bro do geh là bơnàng jă nàng pơn jờng mờ lơh gơ rề uă rlau tai srơh “Mpồl lơh sa kă bro tài cau lơh broă” tàm tơngai tus.

Cau mblàng K’Duẩn