VOV4.K’ho- Gơl gùng rơndeh ntoăt răt Dầu Giây- Liang Khàng kờp jơh geh bơta jòng pơgap 200 kơi sồ, geh tàm pà gơs 3 rơndap broă lơh tàm hơ̆ geh: Dầu Giây- Tân Phú, Tân Phú- Bảo Lộc mờ Bảo Lộc- Liang Khàng. Tàm hơ̆ 2 rơndap broă lơh: Tân Phú- Bảo Lộc mờ Bảo Lộc– Liang Khàng, kờp jơh bơta jòng mờr 140 kơi sồ bơh Ủy ƀan Ñân zân càr Lâm Đồng- Anih lơh broă dà lơgar geh gơnap gơnoar lơh.

Làng bol càr Lâm Đồng sền gròi, sền sră wă sềr rùp đah gùng rơndeh ntoăt răt

Jat Ủy ƀan Ñân zân càr Lâm Đồng, càr geh ai 4 rơbô 500 tơmàn đong bơh kes priă càr dê tàm kờp jơh khà 16 rơbô 200 tơmàn đong ai 66 kơi sồ gùng rơndeh ntoăt răt Tân Phú- Bảo Lộc in; ai 10 rơbô 800 tơmàn đong tàm kờp jơh khà 12 rơbô tơmàn đong, ai 73 kơi sồ bơh rơndap broă lơh gùng rơndeh ntoăt răt Bảo Lộc- Liang Khàng in. Do là khà tă bơh kes priă càr dê uă ngan rlau jơh bơh càr Lâm Đồng dê bơh lài tus tŭ do ai dùl rơndap broă lơh gùng lòt in. Ồng Trần Văn Hiệp, Củ tịc Ủy ƀan Ñân zân càr Lâm Đồng pà gĭt, gùng rơndeh ntoăt răt Dầu Giây- Liang Khàng là bơta kơ̆p gơn dờng ngan bơh kwang bàng mờ làng bol càr Lâm Đồng dê. Den tàng, càr neh lơh ngan rcang lài, gàr niam ală bơta kờñ pal geh nàng rcang sơnđờm mut lơh tơn tŭ rơndap broă lơh geh Thủ tướng Cíñ phủ kĭ ring bal gùng dà broă lơh bơcri priă.

Cau mblàng K’Hạnh