VOV4.K’ho- Bơh nam 2018 tus tŭ do, anih lơh broă geh gơnoar càr Lâm Đồng git gŏ mờ lơh sră lơh glài rlau 1 rbô dơ̆ mus kơl brê, mờ kờp jơh bă brê gơtìp hoàc huơr rlau 223 lồ. Mìng is 6 nhai bồ nam 2022, geh 80 dơ̆ mus kơl, bă brê gơtìp hoàc huơr gơguh mờr 30% pơndrờm mờ bal dùl tŭ nam 2021.

Dùl dơ̆ mus kơl brê dờng ngan pa gơlik geh tàm ƀòn dờng Dà Làc, càr Lâm Đồng

Jat Sở Nông nghiệp mờ Phát triển Nông thôn càr Lâm Đồng yal, uă ngan brê gơtìp roh tàm bă brê neh geh jàu ai ală mpồl lơh sa kă bro in mơya ờ lam lơh rơndap broă halà geh lam lơh mơya lơyài, ờ ai cau atbồ, sền gàr. Càr neh kràñ cê ai wơl 208 rơndap broă bơh ală mpồl lơh sa kă bro dê mờ kờp jơh bă brê rlau 30 rbô lồ. Mờkung kơlôi sơnơng, ngui măi mok pa tàm broă atbồ, tơnguh cồng nha broă lơh atbồ, sền gàr brê bơh ală mpồl lơh sa kă bro tàm càr dê. Ồng Ngô Văn Ninh, Kwang atbồ Cơldŭ lơh broă, cau sơ pơ̆ bơr bơh Ủy ƀan Ñân zân càr Lâm Đồng dê pà git, càr gam ngui ring bal uă broă lơh kràñ cê nàng atbồ, sền gàr brê.

Cau mblàng K’Duẩn