VOV4.K’ho- Drim ngai 14/10, càr Lâm Đồng neh pơyua sră nggal bơh Củ tịc Ủy ƀan Ñân zân càr dê bè broă rơcang lài sơndră mờ jơnau pơhìn gơlik geh dà kŏ dà cò, ngơr bam mờ tơrlah ù tàm càr. Tềng đap broă gơlik geh kal ke bơh trồ tiah dê, kờp dŭ lài tàm ală ngai tus, tàm càr Lâm Đồng geh mìu dờng, càl khồm pràn, pơhìn gơlik geh dà kŏ dà cò, ngơr bam mờ tơrlah ù tàm uă tiah.

Lâm Đồng gam jal mhar lam lơh ală broă lơh rơcang sơndră trồ tiah lơh aniai

Nàng tơrmù lơyah ngan rlau jơh hoàc huơr bè phan tam, phan bơna mờ sền gàr ờdo ờdă ai làng bol in, Củ tịc Ủy ƀan Ñân zân càr sồr Mpồl đơng lam rơcang sơndră trồ tiah lơh aniai mờ jòi dong kờl rềs àr, ală sở, mpồl, gah broă lơh, mpồl cau mờ Ủy ƀan Ñân zân ală kơnhoàl, ƀòn dờng tàm càr mhar lam lơh mơ ală broă lơh rơcang sơndră trồ tiah lơh aniai. Kuơmàng, sền gròi lam lơh ơm gak ngai mang, di tŭ đơng lam, rơcang lài lam lơh broă lơh rơcang sơndră jat jơnau đơs “4 tơn tàm dùl anih”, “3 rơcang lài”, di tŭ ntrờn làng bol tàm ală tiah ngòt rơngơt geh jơnau pơhìn uă gơlik geh dà kŏ dà cò, ngơr bam, tơrlah ù tus anih ơm ờdo ờdă.

VOV Tây Nguyên- Cau mblàng K’Duẩn