VOV4.K’ho- Ngai 07/07, Hội đồng Ñân zân càr Lâm Đồng khoă X neh mŭt pơrjum dơ̆ 6 nàng cribơyai mờ jòi geh ală broă lơh bơsong ală bơta ờ hềt pràn jak, pơn jăt tai bơtàu dong kờl broă lơh sa- mpồl bơtiàn bơh càr dê bơtàu tơnguh. 06 nhai bồ nam do, lơh sa- mpồl bơtiàn càr Lâm Đồng dê lơh geh uă cồng nha niam ngan.

Gùt dơ̆ pơrjum

Tàm hơ̆, pơnrơ ngan là lơh sa gơguh 9,29%; tơrgùm priă dia dà lơgar geh 7 rbô 800 tơmàn đong, gơguh rlau 22% pơndrờm bal dùl tŭ mờ nam lài. Kờp jơh priă geh bơh tăc phan mờ lơgar ndai kung geh rlau 436 tơlak dolar Mỹ, gơguh 43%; mờ năc lòt nhơl geh rlau 3 tơlak 700 rbô nă, gơguh 86,5% pơndrờm bal dùl tŭ mờ nam 2021. Ală broă sền gàr ờdo ờdă rài kis mpồl bơtiàn, tơrmù rƀah, lơngăp lơngai cíñ trị mờ rơndăp tăp sèng ờdo ờdă mpồl bơtiàn geh lơh niam.

Ală kwang bàng Hội đồng Ñân zân lời uă tŭ jiơ cribơyai, bơsong ală bơta gơkòl

Bal mờ cồng nha lơh geh, Lâm Đồng kung gam kong mờ uă kal ke, ờ hềt pràn jak, ngan là gơwèt mờ broă lơh ătbồ sền gàr brê, ătbồ phan kwơ geh is, ù tiah, rơndăp ù tiah... Pơrjum đơs nền, do là ală bơta gơkòl kờñ pal geh tơrgùm cribơyai, mblàng sền, jòi broă lơh tă bơsong nàng ai tơl bơta niam dong kờl lơh sa- mpồl bơtiàn bơtàu tơnguh.

Cau mblàng Lơ Mu K’Yến