VOV4.K’ho- Càr Gia Lai neh mờ gam lam lơh ală broă lơh sơrbac mhar nàng kờñ sơndră wơl mờ mìu càl rbŭt dờng sồ 4. Dùl tàm ală kơnòl broă ngan ngồn geh ƀòn dờng Pleiku lam lơh hơ̆ là tuah wàs rbòng dà, koh kơl ntê chi tàm tiah drà nàng kờñ pleh gơtìp ngơr bam dà tàm bàr pe tiah mờ chi gơ pừ tŭ tìp mìu càl rbŭt dờng.

                          Koh kơl jơh ală ntê chi gơ tò jòng lài mờ tŭ mìu càl rbŭt dờng sồ 4 tus

Nàng di tŭ sơndră wơl mờ mìu càl rbŭt dờng sồ 4 tus, tàm ală ngai lài mờ tus mho ngai 27/09, Cơldŭ Ătbồ tiah drà ƀòn dờng Pleiku neh bal mờ Kông ty Trăc ñiệm Hữu hạn Một thàñ viên Broă bơ̆t bơtàu tiah drà ƀòn dờng Pleiku lam lơh koh kơl jơh ală ntê chi tàm gĭt nđờ rhiang tờm, bè xà cừ, ƀằng lăng, mờ ală tờm chi geh ntê chi gơlì dờng, ntê gơ tò jòng, tàm gùng Lê Hồng Phong, Lê Duẩn, Phan Bội Châu. Bal mờ hơ̆, ală mpồl lam lòt tuah wàs dùl ròt rbòng dà, lơh geh hiòng dà lòt tàm ală dà croh tàm ù tiah ƀòn dờng dê.

Jăt jơnau yal bơh Anih yal lài bè trồ tiah dà ia càr Lâm Đồng dê, tài gơrềng bơh mìu càl dờng sồ 4, tàm bơh 48 tus 72 jơ tus, tàm càr Lâm Đồng geh mìu bơh di mơ tus mìu sơr mờ sơr ngan, uă tiah di gơlan gơtìp gơbam dà, dà cò mờ tơrlah ù. Broă rơcang sơndră mờ rềs àr bơh trồ tiah, sơndră mờ mìu càl dờng sồ 4 gam geh ală mpồl lơh broă geh gơnoar càr Lâm Đồng lơh jăt niam.

                             Càr Lâm Đồng rơcang sơndră mờ gơbam dà, dà cò mờ tơrlah ù

Jăt jơnau yal lài, mìu càl dờng sồ 4 ờ tus tơn tàm càr Lâm Đồng, mơya tài là mìu càl dờng geh bơta pràn uă, bơta gơlời bơh mìu càl dờng uă, den tàng càr do dờp gơrềng bơh mìu sơr bal mờ càl khồm pràn, broă di gơlan gơtìp gơbam dà, dà cò mờ tơrlah ù uă ngan. Den tàng, Mpồl đơng lam rơcang sơndră mờ rềs àr mờ jòi dong klàs cau gơtìp rềs àr càr Lâm Đồng neh đơng lam ală kơnhoàl, ƀòn dờng, ală anih lơh broă geh gơnoar lơh jăt ală broă rơcang sơndră, bañ sền ờ sơ̆p, ờ sền gròi.

Cau cih VOV Tây Nguyên- Cau mblàng Lơ Mu K’Yến mờ Ndong Brawl