Tàm pơrjum dơ̆ 10, Hội đồng Ñân zân càr Lâm Đồng khoă X đơs, broă lơh lơh sră ai gơnoar lơh hìu ơm cau dùl nă să is tàm Dà Làc gam ờ hềt geh sền gròi kơ̆; broă lơh atbồ dà lơgar bè rơndap tap sèng bơt bơtàu tàm ƀòn lơgar gam ờ hềt niam. Uă broă lơh tìs bè rơndap tap sèng bơt bơtàu geh broă lơh dờng mơya ờ hềt geh kâp geh gơnoar sền gròi, bơsong di tŭ. Geh broă neh gơtìp lơh glài mơya kung gam pơn jat tai lơh tìs lơh mpồl bơtiàn ờ suk ngan. Tàm hơ̆, dơ̆ tơrlah taluy, tơrlah broă lơh gam geh lơh neh lơh 2 nă cau chơt mờ 5 nă cau gơtìp sồt să gơlik geh tàm sơnah ƀòn 10, ƀòn dờng Dà Làc tàm lồi nhai 6 pa do là dùl pơn yơu.

Ồng Trần Văn Hiệp, Củ tịc Ủy ƀan Ñân zân càr Lâm Đồng đơs là, broă lơh rơndap ù tiah, rơndap tap sèng bơt bơtàu tiah drà pal pơn jat tai geh sền gròi kơ̆. Gơnoar atbồ mờ gah lơh broă geh gơnoar pal cribơyai mờ ai tơlik tơl khà ngan ngồn ai tơl tiah in, ngan là tàm ală tiah kơh, tiah lin taluy uă. Ồng Trần Văn Hiệp đơs: “Sền mờ mat ờs den gŏ pơhìn gơlik geh aniai, ờ niam, rơngòt ngan mơya Dà Làc kung gam ai gơnoar lam lơh. Mù tàm gùng Mimosa, Khe Sanh geh tiah geh tus 3, 4 hìu kuơ̆ gơlang geh lơh tềng dòr bơnơm, tềng hơ đơm jơng bơnơm den pal kờp sền wơl, bơta do pơhìn gơlik geh aniai là uă ngan. Dilah pal lơh den ai wơl jơh ală broă lơh, kờp bal mờ sră ai gơnoar lam lơh. Broă tơrlah pa do là jơnau bơsram dờng ngan. Ai tuh 5 rbô tấn ù, kờp jat hệ số den gơguh tus 8 rbô tấn, mờ geh ală dơ̆ mìu den gơguh tus nđờ jơt rbô tấn… Lơh tìs jơh bal mờ gùng nhàr lơngap lơngai che ồs đèng, hơ̆ là lơh bơdìh tiah nhàr geh ai gơnoar. Lơh taluy den kung ờ lơh jat jơnau sồr càr dê, lơh rlau 4 thơk, bơta yah ngài đah ală taluy bè hơ̆ den ờ di, den tàng lời gơlik geh broă pơlai soh ngan”.

Kung tàm pơrjum Hội Đồng Ñân zân càr Gia Lai pa do, ală kwang bàng neh tơrgùm lùp uă broă geh sền gròi uă tàm gah bơt bơtàu tàm càr. Tàm hơ̆, bơta lơh homestay, hìu kuơ̆ gơlang tìs mờ adat boh lam neh lơh mpồl bơtiàn ờ suk ngan. Tài lơyài lơh sir ală bơta rơndap ù tiah tàm ală tiah neh gơ gơs bơta kòl yan tàm broă lam lơh ală rơndap broă bơcri priă.

Ồng Nguyễn Bá Thạch, Kwang atbồ Sở Xây zựng càr Gia Lai đơs là, broă lơh atbồ dà lơgar bè rơndap tap sèng bơt bơtàu tàm càr geh bơta ờ sền gròi kơ̆. Uă broă lơh tìs mờ adat boh lam neh lơh sir hơ̆ sồng geh git gŏ, lơh gơbàn bơta bơsong kal ke. Jơnau git wă lơh jat bơh làng bol dê ờ huan niam, uă cau git là tìs mơya kung gam lơh, lơh gơbàn kal ke, jŏ jòng tŭ tơngai lơh glài mờ priă.

Bè broă lơyài lam lơh ală rơndap ù tiah, lơh gơbàn uă kal ke tàm broă atbồ rơndap tap sèng bơt bơtàu mờ lơh gơ rềng tus broă lam lơh kơnòl broă bơcri priă dà lơgar, ồng Nguyễn Bá Thạch pà git dùl bơta geh ngan, hơ̆ là tŭ do khà rơndap ù tiah tam pà bă tiah, rơndap ù tiah mùl màl tàm càr mìng rơp pa geh hơ đơm 30%, lơyah rlau mờ khà kờp bal gùt lơgar dê: “Sồr ală tiah, ală rơndap ù tiah ờ gam tai, pal kờp sền nàng sang tĕ, rơndap ai priă bơcri nàng lơh rơndap ù tiah mùl màl, gàr niam ală kâp kuơmàng. Tàm tŭ tơngai ờ hềt tơl priă jền mờ tŭ tơngai nàng lơh rơndap ù tiah mùl màl tàm càr den lơh mơ kơrnuat atbồ bơceh lơh hìu đam nàng atbồ rơndap tap sèng bơt bơtàu tàm càr”.