VOV4.K’ho- Bơh bồ nam tus tŭ do, càr Lâm Đồng gơlik geh rlau 50 dơ̆ mus kơl brê, tàm hơ̆ geh 14 dơ̆ ờ hềt gĭt nền cau lơi mus kơl. Anih lơh broă geh gơnoar neh lơh sră lơh glài 47 dơ̆, tàm hơ̆ geh 3 dơ̆ lơh glài kŭp jàm, kŭp ai rlau 84 khối dơm chi wil ală bơta mờ tong kes priă dà lơgar in rlau 789 tơlak đong.

Tàm khà do, pơneh ngan mờ kal ke ngan rlau jơh là 5 dơ̆ mus kơl brê dờng ngan gơbàn tàm ù tiah ală kơnhoàl: Lạc Dương, Dam Rong mờ Bảo Lâm. Tŭ do, anih lơh broă kwang àng gam pơn jăt tai lùp khàu, lơh gơs sră nggal nàng bơsong ală cau lơh tìs. Jăt Sở Nông nghiệp mờ Phát triển Nông thôn càr Lâm Đồng yal, ờ mìng mus kơl brê lơm mờ jơnau sơgràm ai ù brê kung gơguh tai sơl. Gơbàn jơnau do là tài bơh jơnau kờñ bè ù tiah mờ giă ù gơguh jơnhoa ngan, uă cau ờ gŏ rơngòt adat boh lam, lơh ală broă lơh sơgràm ai mờ sơgràm ai tai ù brê nàng tăc jòi sa priă jền tìs mờ kơrnoăt boh lam. Gơwèt mờ ală bă ù do, mpồl lơh broă geh gơnoar kràñ cê kơ̆ nùs ai wơl ù mờ lam tam wơl brê, lơh glài kràñ ală cau lơh tìs.

Cau mblàng Lơ Mu K’Yến