Dơ̆ lam lơh là broă sơn đờm tàm ròt ală broă lơh uă mblàng yal, bơto bơtê, tơnguh jơnau git wă rơcang lài kơryan rềs àr bŭ dà ai kơnòm dềt, kơnòm bơsram in tàm càr Dăk Lăk nam do. Bơh bồ nam tus tŭ do, gùt càr neh geh 25 nă kơnòm bơsram chơt bŭ dà. Nàng kờñ tơrmù ƀà bơta do, gah bơto bơtê mờ bơsram pơgồp bal mờ ală mpồl lơh broă geh gơ rềng lam lơh ring bal, kràñ cê, geh cồng nha ală broă lơh bè rơcang lài kơryan bŭ dà. Sở Giáo zụk mờ Đào tạo càr Dăk Lăk sồr ală hìu bơsram sơlơ mblàng yal, tơngkah lài, bơto bơtê jơnau git wă, bơta chài rơcang lài kơryan bŭ dà tus kơnòm bơsram, ngan là tàm ală ngai rlô bơkang. Sơlơ tơnguh tai srơh bơto re dà lơngăp lơngai ai kơnòm bơsram in tàm hìu bơsram, sùm pờ ală ơdŭ bơto re dà kơnòm bơsram in.