VOV4.K’ho- Drim ngai 29/07, Mpồl đơng lam dà lơgar ală Broă lơh jơnau kờñ dà lơgar tơngai bơh nam 2021-2025 bơyai lơh pơrjum pờ tơlik tơn tàm internet sền sơ wì bè cồng nha lơh jat ală broă lơh jơnau kờñ dà lơgar 6 nhai bồ nam 2022; lam lơh ală kơnòl broă, gùng dà broă lơh 6 nhai lồi nam 2022. Phó Thủ tướng Thường trực Cíñ phủ ồng Phạm Bình Minh- Kwang atbồ Mpồl đơng lam dà lơgar ală broă lơh jơnau kờñ dà lơgar tơngai bơh nam 2021-2025 đơng lam pơrjum.

Tàm pơrjum, kwang đơng lam bồ ală Ƀộ, ngàñ mờ ală tiah neh yal, đơs loh ală bơta kal ke, kòl yan; tơrgùm cribơyai, đơs ală gùng dà broă lơh nàng kờñ bơsong wơl ală bơta gam gơ kòl tàm tơngai pa do, nàng lơh mhar tơngai mờ cồng nha lơh jat ală broă lơh jơnau kờñ dà lơgar 6 nhai lồi nam 2022. Phó Thủ tướng Thường trực Cíñ phủ ồng Phạm Bình Minh tơngkah, ală ƀộ, ngàñ mhar ai ngui ală sră nggal bơto pơlam jat gơnap gơnoar nàng ală tiah in geh bơnàng jă lam lơh jat; ală càr, ƀòn dờng sồr lơh kràñ cê jơh nùs, lam lơh geh cồng nha 3 broă lơh jơnau kờñ dà lơgar, jơh nùs lơh ngan tus lồi nam lơh sir ai priă ală khà priă geh tam pà bơh dà lơgar nam 2022 dê.

Cau mblàng K’Hạnh