VOV4.K’ho- Drim ngai 28/3, tàm càr Vĩnh Phúc, Đoàn Ơruh pơnu Kộng sản Hồ Chí Minh dà lơgar bơyai lơh dơ̆ lam lơh jat Nam ờdo ờdă gùng lòt nam 2022. Mờ tơngume “Tài pràn kơldang să jan, màng kis bơh cau đì rơndeh dê”, ală kấp ƀộ đoàn, Hội, Đội gùt lơgar geh lam lơh dùl ròt ală broă lơh tơnguh chài rơgơi gùng lòt, gàr niam ờdo ờdă gùng lòt tàm ală tiah sùm gơlik geh rềs àr gùng lòt, tus bal bơt bơtàu phan bơna gùng lòt.

Bơdìh hơ̆ tai, Đoàn Ơruh pơnu Kộng sản Hồ Chí Minh dà lơgar geh pơgồp bal mờ Ủy ƀan ờdo ờdă gùng lòt dà lơgar lam lơh ală broă lơh dờng bè Ngai chờ ơruh pơnu mờ chài rơgơi gùng lòt, cribơyai ơruh pơnu mờ chài rơgơi gùng lòt, pơrjum kwang đơng lam bồ kơnòm să mờ ờdo ờdă gùng lòt, dơ̆ pơrlòng Ngui kông nghệ tàm broă lơh gàr niam ờdo ờdă gùng lòt. Tơnơ̆ dơ̆ lam lơh, mờr 1 rbô nă đoàn viên, ơruh pơnu càr Vĩnh Phúc neh lòt tàm gùng pơn jờng, mblàng yal bè ờdo ờdă gùng lòt, tus bal cribơyai Ơlak, bièr mờ rềs àr gùng lòt.

Cau mblàng K’Duẩn