VOV4.K’ho- Ngai 13/05, tàm ƀòn dờng Buôn Ma Thuột, Ƀộ Nông nghiệp mờ Phát triển Nông thôn pơgồp bal mờ Ủy ƀan Ñân zân càr Dăk Lăk bơyai lơh dơ̆ lam lơh Tơngleh Dà lơgar dà sàng goh mờ sàng goh tiah ơm kis nam 2022.

Mờ tơngume, “Ătbồ, pờ mờ ngui niam sùm broă lơh pà dà mờ sàng goh ƀòn lơgar”, Tơngleh Dà lơgar dà sàng goh mờ sàng goh tiah ơm kis nam do nàng kờñ tơnguh uă bơta gĭt wă, kơnòl bơh hìu bơnhă, ƀòn lơgar mờ gơnoar ătbồ ƀòn lơgar dê tàm broă ătbồ broă ngui, pờ ngui broă lơh pà dà mờ sàng goh ƀòn lơgar ờdo ờdă, kơ̆ kơl jăp nàng sền gàr pràn kơldang să jan, rơcăng sơndră kòp bơtờp, tơnguh uă bơta niam rài kis, wèt tus jơnau kờñ bơtàu tơnguh kơ̆ kơl jăp. Jăt tơrgùm kờp, tŭ do khà làng bol ƀòn lơgar ngui dà sàng goh tàm jơh gùt lơgar geh 90%; 96% hìu bơsram, hìu sơnơm geh broă lơh pà dà mờ sàng goh.

Cau mblàng Lơ Mu K’Yến