Ngai 14/07/2016, Tổng Ƀí thư ồng Nguyễn Phú Trọng neh lòt còp xã Bản Bo, kơnhoàl Tam Đường, càr Lai Châu. Ală jơnau đơs pơndờm pơnđiang bơh Tổng Ƀí thư dê neh gơ gơs bơta gơn kơnờm dong lơh geh tai bơta pràn nàng làng bol, gơnoar atbồ xã Bản Bo in brồ guh lik klàs rƀah. Gĭt wă jrô ngan jơnau pơndờm pơnđiang, bơto bơtê bơh Tổng Ƀí thư dê, gơnoar atbồ mờ làng bol ală jơi bơtiàn xã Bản Bo pơn đơl pràn lơh ngan brồ guh, sơr lèt gan kal ke nàng tŭ do xã Bản Bo gơ gơs “tiah tờm” tam cè bơh kơnhoàl Tam Đường dê, rài kis làng bol ngai sơlơ bơtàu tơnguh.

Đảng ƀộ, gơnoar atbồ mờ làng bol ală jơi bơtiàn xã Bản Bo sùm cih kah ală jơnau nting tơngkah bơh Tổng Ƀí thư dê, hơ̆ là tơrgùm bơtàu tơnguh lơh sa mờ lơh sa suơn sre, bơt bơtàu ƀòn lơgar pa, ngui bơta ƀuơn bơta pràn nàng tam uă tờm chi sa plai, ròng phan poan jơng, tam tờm ce niam bơkah pơgồp bal mờ mpồl lơh sa kă bro nàng rcang broă tăc bro bơh phan bơna dê mờ tam gơl rơhời tus broă lơh bơtàu tơnguh ală drơng broă nàng gơ hòi gơ jà năc lòt nhơl.

Tàm tiah nhàr lơgar kơnhoàl Tuy Đức, càr Dăk Nông, kơno jơnau yal Tổng Ƀí thư ồng Nguyễn Phú Trọng sang rài, kwang bàng, đảng viên mờ làng bol ală jơi bơtiàn ndrờm moăt jrùng ngan gơwèt mờ kwang đơng lam jơh rài kis tài dà lơgar, tài làng bol.

Ồng Điểu Khanh, kòn cau M’nông, Phó Củ tịc Anih duh broă làng bol xã Quảng Trực yal: “Bơh tiah nhàr lơgar ngài do, kơno jơnau yal Tổng Ƀí thư ồng Nguyễn Phú Trọng sang rài, kwang bàng, đảng viên mờ làng bol tàm xã Quảng Trực moăt jrùng mờ kah pơlai ngan dùl nă cau đơng lam jơh nùs tài dà lơgar, tài làng bol, dùl nă cau geh pơnrơ niam bè nùs nhơm kăc màng. Do là bơta roh rui dờng ngan gơwèt Đảng, Dà lơgar, làng bol dê, tàm hơ̆ uă ngan là tàm bơta dà lơgar he gam lơh jăt pràn broă bơ̆t bơtàu Đảng, rơcang kơrian sa kuề sa koà geh tơngŏ dờng màng ngan bơh Tổng Ƀí thư ồng Nguyễn Phú Trọng dê. Kwang bàng, đảng viên mờ làng bol ală jơi bơtiàn tàm xã kung gam sùm kah tus jơnau Tổng Ƀí thư nting bơto, pal sùm tam klăc bal, dùl nùs bal, pin dờn tàm broă đơng lam bơh Đảng, Dà lơgar, pơn jăt tai lơh ngan bơsram sră, lơh ngan bơ̆t bơtàu tiah nhàr lơgar pas gơs”.

Kung bè ală jơi bơtiàn oh mi ndai tàm jơh kơnhoàl ù tiah Dà lơgar dê, tŭ klo yal Tổng Ƀí thư ồng Nguyễn Phú Trọng sang rài, làng bol kòn cau Prum tàm càr Bình Thuận tơngŏ bơta pơlai soh ờ gĭt lơh ngan. Ồng Lâm Tấn Bình, Kwang bàng neh jơh sơnam lơh broă kòn cau Prum ơm tàm xã Phan Hiệp, kơnhoàl Bắc Bình, càr Bình Thuận pà gĭt, bơh jat sền ală jơnau đơs tàm ală dơ̆ pơrjum, broă lơh dờng bơh Dà lơgar dê, ồng kờñ uă ngan mờ ală tơngume sồr lơh jrô ngan bơh Tổng Ƀí thư dê mờ is ồn là ală jơnau đơs geh gơrềng tus broă pin dờn jat Yàng, jơi bơtiàn; bơh hơ̆, tơngŏ bơta pràn dờng ngan bơh mpồl tam klăc dờng jơh gùt jơi bơtiàn dê tàm broă lơh bơtàu tơnguh lơh sa- mpồl bơtiàn Dà lơgar dê.

Ồng Lâm Tấn Bình, đơs: “Tŭ kơno yal Tổng Ƀí thư ồng Nguyễn Phú Trọng sang rài, tàm pơlai nùs bơh ồng dê kung bè jơh ală làng bol kòn cau Prum ngoh rơngăc muat jrùm ngan. Wa Trọng sang rài lời wơl ai jơh gùt jơi bơtiàn Việt Nam in bơta pơlai soh. Tài bơh, jơh rài kis he dê, Wa neh cèng jơh bồ tơngoh jak, dà kơl hề mờ nùs nhơm ơn pơdơng ai Dà lơgar in, lơh ai Dà lơgar Việt Nam in pas gơs mờ pràn kơl dang kơ̆ kơl jăp. Wa là dùl nă kwang đơng lam bồ dờng màng tàm lơgar Việt Nam, Wa sang rài lời wơl bơta niam bơnĕ ngan tàm làm gùt tiah pơn yơu bè bơta bô thồm gơ rề uă dê".

Jơnau yal Tổng Ƀí thư ồng Nguyễn Phú Trọng sang rài là bơta moăt ngan gơwèt mờ ală làng bol dê, tàm hơ̆ geh bal mpồl cau đơs crih tamya gùt lơgar đơs bal mờ cau chài đơs crih tamya kòn cau Khmer đơs is. Bi Thạch Sroh, kis tàm xã Đôn Châu, kơnhoàl Duyên Hải, càr Trà Vinh là cau tàm mpồl Văn họk Nghệ thuật càr pà git, mpồl cau đơs crih tamya kòn cau Khmer tàm tơngai do neh geh uă pơgồp tàm broă prăp gàr mờ ngui niam bơta chài ờs mờng kòn cau dê. Mìng is să tờm bi, tàm tơngai tus rơ̆p pơn jăt tai lơh ngan nàng ai gah niam chài do in.

 Bè broă sang rài bơh Tổng Ƀí thư ồng Nguyễn Phú Trọng, bi Thạch Sroh tơlik nùs nhơm moăt mờ đơs: “Tổng Ƀí thư ồng Nguyễn Phú Trọng jăk ngan, ồng sền gròi ngan bè bơta niam chài jơi bơtiàn lơgar Việt Nam đơs bal, tàm hơ̆ sền gròi, lam sồr làng bol ală jơi bơtiàn prăp gàr mờ ngui bơta niam chài jơi bơtiàn dê. Tŭ do, tŭ kơno yal Tổng Ƀí thư neh roh, añ mờ làng bol kòn cau Khmer moăt ngan, dan kah sùm ală jơnau nting bơto, ală broă lơh bơh ồng dê gơwèt mờ làng bol”.