Ngai 14 nhai 08 nam 2014, tàm dơ̆ lòt lơh broă tàm ƀòn dờng Cần Thơ, Tổng Ƀí thư ồng Nguyễn Phú Trọng bal mờ mpồl kwang bàng lơh broă bơh Dà lơgar neh ai tơngai tus còp, lơh broă mờ Đảng ủy, Mpồl đơng lam Quân khu 9. Ai tơngŏ tiah lơh broă bơh Quân khu dê là dùl ù tiah rơcang sơndră lài kwơ màng ngan, Tổng Ƀí thư sồr tàm bơta pa geh bơta gơlik mhar, kal ke, ờ git lài, Quân khu 9 pal pơn jăt tai rơcang lài git ală jơnau tơngit, git nền ală bơta gơlik geh, bañ lời gơtìp ờ thàn, ni sơna, gàr niam tŭ lơi kung rơcang lài tam dră, drơng broă tam lơh tàm ală bơta gơlik geh lơi; sền gàr kơl jăp kơl wàng trồ, bồt dà lềng, gơnoar tờm ù tiah Dà lơgar.

Lơh jăt jơnau đơng lam bơh Tổng Ƀí thư ồng Nguyễn Phú Trọng, ală nam do, kwang bàng, cau ling tàm Quân khu 9 sùm đòm jăt uă nùs nhơm tam klăc bal; lơh jăt ndrờm bal, geh cồng nha ală broă bơ̆t bơtàu Đảng ƀộ Quân khu 9 pràn kơl dang bè cíñ trị, bồ tơngoh kơlôi sơnơng, nùs nhơm, mpồl rơndăp broă mờ kwang bàng.

Tŭ gam kis, tàm uă gơnoar broă lơh broă bơh he dê, Tổng Ƀí thư ồng Nguyễn Phú Trọng sùm lời ai ală nùs nhơm uă ngan mờ bơta sền gròi is ồn ngan gơwèt mờ kwang bàng, cau Ling dà lềng làng bol Việt Nam đơs bal mờ mpồl ling Trường Sa đơs is. Dơ̆ tơm bơh bơr bơh Tổng Ƀí thư dê tàm dơ̆ lòt lơh broă bơh Wa dê tus còp Tiah 4 Ling dà lềng tàm ngai 05/05/2016, Tổng Ƀí thư neh jơh nùs lùp còp rài kis bơh kwang bàng, cau ling mờ làng bol kơnhoàl ƀồt Trường Sa; pơndờm pơnđiang bol añ tam klăc bal, pơnđơl pràn lơh ngan sơr lèt gan kal ke nàng lơh sir jak ngan kơnòl broă mờ Đảng, Dà lơgar dê jàu. Tổng Ƀí thư sùm pin dờn tàm nùs nhơm kơ̆ dơn cíñ trị, nùs nhơm tam lơh, crăp rcang dờp phi să bơh kwang bàng, cau Ling dà lềng đơs bal mờ kwang bàng cau ling Tiah 4 đơs is tàm kơnòl broă sền gàr gơnoar tờm bồt bơlào dà lềng bơh Dà lơgar dê.

Thượng tá Nguyễn Văn Khương, Cíñ trị viên bồt Song Tử Tây sùm kah jơnau đơs pơn rơ ngan bơh Tổng Ƀí thư ồng Nguyễn Phú Trọng dê “Bơngă pin dờn hơ̆ sồng là bơta dờng màng, bơta kwơ màng uă ngan rlau jơh”: “Tổng Ƀí thư ồng Nguyễn Phú trọng là cau krơh niam lam lài bè nùs nhơm, bè bồ tơngoh kơlôi sơnơng  cribơyai jơnau tàm sră, bè broă lơh lơh broă mơya bơta mờ añ kờñ ngan là sùm kah jơnau đơs hơ̆ là jơnau đơs bơh Tổng Ƀí thư dê tàm pơrjum gùt lơgar ală anih lơh broă Nội cíñ lam lơh jat Jơnau lơh nền tàm pơrjùm sồ 13 bơh Đảng dê ngai 15 nhai 09 nam 2021. Hơ̆ là: “Rài kis kòn bơnus dê mìng kis geh dùl dơ̆ lơm, pal kis bè lơi nàng geh kwơ, nàng ờ pal plai soh mờ wờl să tài ală broă lơh ờ niam mìng kơlôi ai să tờm in lơm, ờ gĭt bàs sìl. Priă jền uă lơh ñchi, chơ̆t ờ gơtùi at bal. Bơngă pin dờn hơ̆ ngan là bơta dờng màng, bơta kwơ màng uă ngan rlau jơh”.

Tàm dơ̆ tus còp, lơh broă tàm càr Kon Tum tàm nhai 04 nam 2011, Tổng Ƀí thư, Củ tịc Quốk hội ồng Nguyễn Phú Trọng ai uă ngan tơngai tus còp làng bol kòn cau Bơnhàr kis tàm ƀòn Đăk Mút, xã Đăk Mar, kơnhoàl Đăk Hà. Tàm do Tổng Ƀí thư jòi nàng git bè rài kis, iăt jơnau đơs, nùs nhơm kơ̆p kờñ mờ nting bơto làng bol đòm jăt nùs nhơm tam klăc bal, bơceh lơh tàm broă lơh sa. Kah wơl jơnau nting bơto bơh Tổng Ƀí thư dê, 13 nam do, 148 hìu làng bol kis tàm ƀòn Đăk Mút neh sơrlèt mờ uă kal ke nàng bơtàu tơnguh lơh sa, rài kis gơguh mờ bơ̆t bơtàu geh cồng nha ƀòn lơgar pa.

Bi A Nguyên, Phó Ƀí thư Đoàn xã Đăk Mar, mờ kung là Kwang atbồ ƀòn Đăk Mút đơs nền: “Kah jơnau Wa Trọng nting bơto să tờm añ neh tam gơl bồ tơngoh kơlôi sơnơng, broă lơh. Mờ ală broă lơh añ neh lơh gơs Mpồl Ơruh pơnu jăt yàng bơtàu tơnguh lơh sa nàng bơh tŭ hơ̆ ơruh pơnu gơtùi lơh tờm să tờm, lơh tờm broă lơh sa. Tŭ do, Mpồl neh geh rơlao 15 nă cau tơrgùm bal ơruh pơnu nàng bơtàu tơnguh lơh sa hơ̆ sồng tus bal mŭt Đoàn, Mpồl”.